7th. Pay

Chief minister Lal Thanhawla chuan, tun dinhmunah chuan Mizoram sorkarin a hnathawkte hnena 7th Pay Commission rawtna anga hlawh pek a tlin hrih loh thu a sawi, "Sum sên belhna tur lam chu kan lawm vak lo a, sum hmuh belhna tur lam kan lawm zawk. Sorkar laipui aṭanga ṭanpuina tam zawk hmuh a nih loh chuan tun dinhmunah chuan 7th Pay kan tlin rih lo," a ti.

Tun hnaiah sorkar hnathawkte hlawh lak dan thar tur duan a ni a, he hlawh bi thar hi Mizoram sorkarin a hmang ve a nih chuan Mizoram sorkar hnathawkte hlawh hi sang takin a pung dawn a ni. Sorkar hian tlin se chu a hnathawkte hlawh hi tipung ngei se, chu chu sorkar hnathawk ve lem lote pawhin an chhawr ṭhin a ni.

Industry lian tham awm lohna Mizoram angah hi chuan sorkar hnathawkte hlawh vir kual vel hi mi tam tak sum hmuhna ber a ni a, anni lam hlawh a pun hian mi dangte pawhin hamṭhatna an dawn phah thei. Chutihlaiin sorkar hnathawkte hlawh tihsanna tur pawisa hi Mizoram sorkarin a nei si lo a nih chuan, ṭhlawh tihsan ngawt theih a ni lo.

Mizoram sorkar sum bawm awm dan hre chiangtu ber chu sorkar hnathawkte hi an ni a, leiba a ngah dante leh sum hman mai tur a tlakchham dante pawh an hre ber ang. Chuti chunga anni lamin 7th pay hmang tura sorkar an kar emaw, an nawr emaw a nih chuan mahni hmasial tak angin an lang thei ang. 'Mizoram sorkar chu retheiin hmasawnna hna pawh kal thei dawn lo mah se, an hlawh a pun dawn phawt chuan a ṭha,' tih rilru pu ang hialin an lang thei ang.

Engpawhnise Mizoram-in kum 2018-ah inthlan a hma-chhawn dawn a, he hunah hian sorkar hnathawkte vote duh avanga hlawh sang pek tiam mai ni tawh lo se, Mizoram sorkar sum dinhmun dik tak ngaihtuah chungin, ramin a tlin tawk hre reng chungin sorkar hnathawk hlawh hi siam ṭhin ni rawh se.