Aizawl bawlhhlawh

Aizawl Municipal Corpo-ration (AMC) councillor-te chuan, tun hnai khan Aizawl khawpuia bawlhhlawh paih leh sawngbawl dan ṭha zawk a awm theih dan tur an ngaihtuah. Aizawl bawlhhlawhte Tuiriala paihna kalphung tihṭhat dan tur te, bawlhhlawh paihna mual hran siam leh bawlhhlawh sawngbawl dan
ṭha nia an ngaihte an sawiho a, AMC-in Aizawl khawpui bawlhhlawh leh a sawngbawlnaah theihtawp an chhuah zel tur thu an sawi.

Aizawl khawpui hi a ṭhang chak hle a, mumal taka ruahman lawk a awm loh avangin kawng tam takah harsatna a thlen phah. Mihring chenna hmun thlan, in sak dan, kawngpui siam, tui in tur pek, bawlhhlawh sawngbawl leh kawng hrang hrangah ruahmanna a fel lo hle a, tun hnuah ṭan lak thar leh ni mah se, thil tih a hautak tawh hle.

Bawlhhlawh paih dan mumal lo tak chu sorkar-in PPP hmangin ruahmanna ṭha tak a siam a, bawlhhlawh lakkhawm leh paih dan bikah chuan a kal mumal ta hle. Tunah AMC kutah dah a ni a, anni lam pawhin ṭan an la a, Aizawl khawpui bawlhhlawh paihna leh sawngbawl zui dan an zir chiang a, ruahmanna ṭha tak an siam theih ngei i beisei ang.

AMC hian thil tam tak ngaih-tuahin tih vak tum kher lo hian, an thiltih chhunah erawh sorkar aia ṭha leh fel zawka ti thei tur khawpin ṭan la ta se mipuiin an chhawr zawk mai thei a, bawlhhlawh sawngbawl danah te hian sorkar timualpho lêt thei tur khawpin ṭan la se a ṭha khawp mai. Aizawl khawpui enkawltu turte hian thil zawng zawng khawih an tum chuan sorkar te chi angah an chhuak thei a, an khawih chin hi bel takin ti se, a bikin bawlhhlawh sawngbawl kawngah hian thang chhuah thei tur khawpin ṭang se a duhawm hle.

Aizawl khawpui bawhhlawh leh ek paihnate hi a ṭha tawk lo a, thiamna sang zawk hmangin plan ṭha tak nei thei se, AMC hian he mi bik hi luhchilhin hmingṭhatpui thamin ṭan la ngam law law se; he khawpui hi a lo thianghlim a, bawlhhlawh sawngbawl dan ṭha kan neih phawt chuan khawpui dangte pawhin an entawn ang a, AMC hian fak a hlawh kumkhua tawh ang.