Zu rui hrem

Tun hnaiah Mizoramah zu khap burna dan hlih a ni a, khuahkhirhna hnuaiah zu an zuar ta a. Hmun tam takah dodalna awm bawk mah se, rorelna sang lamin dan hmanga a phal tawh avangin zu chu dan hnuaiah an zuar ṭan ta.

Mizoram sorkar hian MLTP Act hlipa MLPC Act a hman ṭan dawn khan sawiselna a tam a, tun thleng pawhin sawiselna hi a la tawp lo. Zu zawrh duh leh duh lo inhnialna a la kal zel a, sorkar lamin an sawi chian chu zu hi an zawrh hunah chuan zu rui hremna dan mumal tak kalpui a nih tur thu leh, khawlaia zu rui an awm lohna tura ṭan lak an tum thute a ni.

MLTP Act an hlih tawh hnu, sorkarin dan anga zu a la zawrh ṭan hma deuh khan zu rui mante kha vantlang hna thawhtir an ni a, mipui pawhin an thlawp hle a ni. Tun hnaiah hian zu rui mante hi sorkar hian engtin nge a tih a, kha hremna ang kha a la kalpui zel em? Sorkar hian zu a zawrh hmain mipui hnenah intiamna ang deuhin zurui chunga an khauh tur thu an sawi ṭhin a, tunah hian an khauh ta reng em, tih hi an inenlêt a ngai e.

Zu an zawrh tawhna Aizawl khawpuiah mi tam tak rin aiin zu rui leh pawikhawihna thleng a tam lo a ni mai thei a; nimahsela zu zawrh hma leh zu zawrh hnu chu a inang thei hauh lo ang. Zu an ruih vanga man an awm a nih chuan sorkar hian hremna hi dan angin kalpui zel se, insawipui leh inngaihdamna ang chi reng reng hi kalpui suh se.

Mi tam tak dodalna karah sorkarin zu a zuar ta a, nghawng chu a nei ngei ang tih a chiang. Engpawhnise sorkar hian a ngama zu a zuar a nih chuan, zu rui hremna lam hi khauh zawka a kenkawh a ngai a, Excise leh Police zu rui ngatte phei chu na zawka hrem theih ni se a inhmeh hle ang. Tunah mipuiin sorkar chet dan an thlir reng a, zu zuar ngam sorkar chuan zu rui a hrem ngam tur a ni a, khauh takin dan a lekkawh tur a ni ang.