Tualthihna thleng leh a kaihhnawih

Tun hnai, kar kal ta chhung khan Mizoramah tualthihna ṭum hnih a thleng. February 13-ah Mamit district chhung Bungṭhuam khuaa pa pakhat chu thia hmuh a ni a, February 15 zanah Salem Veng Mualpuiah nu pakhat chu a pasalin kut a thlak avangin a thi nia sawi a ni bawk.

Mizoramah tualthihna a thleng leh ṭhin hi a pawi hle mai. Mi kut tuara thite hi Mizoram mipuiin an khawngaih a, mi tam tak rilru a nat rualin, thinrim tak takte pawh an awm a ni. Mualpui nu pakhat thih dan hi chu a chianga ngaih a ni a; Bungṭhuam pa thih dan tak erawh chu hriat chian a la ni lo thung.

A bik takin Mualpui, Salem Veng nu thihna hian Mizo mipui thin a ṭháwng a, mi tam tak rilru a tina a, awmhmunah rilru hrehawm takin an lo awm ve phah a; a zialo tak zet. MHIP phei chuan an hmeichhiatpui tawrhna hi an tawrhpui a, Aizawlah punkhawm an huaihawt hial a ni.

Pawl hrang hrangin pawikhawihnaa mawhphurhtute man chhuah ngei leh dan hmanga an phû ang taka hrem an phût thu an puang a; heng an thil phûtte hi a awm em em a ni. Pawi khawihtute hrem an nih ngei theih nan hnu chhuitute leh mawhphurtute'n theihtawp an chhuah a ngai a; a ṭulna apiangah mipui leh pawlte'n an thawhpui thiam a ngai bawk.

Chhiatna leh pawikhawihna a thlen cháng hian youtuber zinga eng emaw zat chu mawi leh mawi lo pawh thlu loin an che thuai ṭhin niin a lang. Chhiatna thlengah an lawm zawk emaw tih mai tura chê-ah leh mi chhiattawhna remchanga làa sum hmuhna atana hman hman tumah youtuber eng emaw zat chu mi tam tak chuan an ngai hial a; a zialo tak zet.

Pawikhawihna leh chhiatna thleng puanzar chungchangah traditional media-a thawk journalist-te hi chu an fimkhur thiam a, tihchhuah àwm leh àwm loh an hre tlangpui.

Social media hmanga thuthar thehdarh ṭhinte zingah erawh chuan mawi leh mawi lo, àwm leh àwm lo ngaihtuah duh loin, hawihhàwmna tel loa che leh thu thehdarh an tam niin a lang. A bik takin youtuber-te hi an inzir belh a ngai tak zet a, Zo nun ze mawi tihdaltu ni lo tura an fimkhur a ṭul a ni.