Mahni intihhlum

Tun hnaia Aizawla World Suicide Prevention Day an hmannaa thusawitute chuan, Mizoramah kum ruk chhungin kum tin mi 70 vel anmahni an intihlum anga chhût a nih thu an tarlang. Mahni intihhlum tum mi 56 dinhmun an zir chian aṭangin, depression vanga mahni nunna lak tum 30.4% an awm a, chu'ng zingah chuan zu leh ruihhlo dang ti an tam zawk.

Mizorama heti zat mai mahni intihlum an awm ṭhin hi a pawi hle mai a, a zavaiin ven theih ni lo mah se inven dan a awm avangin chhung tinte he mi kawnga kan harh thar a ṭha hle. Mahni nunna lak duh hial khawpa rilru mangang leh tawt, sawi chhuahna remchang hmu lo leh sawi chhuak hleithei tawh lo khawpa harsatna nei heti zat an awm hi ngawih bopui mai chi a ni lo a, chik zawka zira ṭanlak thaihna kawnga ke pen nghal a hun hle a ni.

Mi 70 vel zet kum tin an intihlum a nih chuan, intihhlum duhna thinlung pu phei chu hei ai hian a lêt tam takin an tam dawn tihna a ni. Intihhlum duhna rilru nei mi ṭhenkhat chuan puitu an hmuh fuh avangin an thil tum an ṭhulh a, Pathian thu lama ṭanpuitute leh thiamna lama anmahni puitu an pan fuh chuan an thil tum chu
ṭhulhtir theih an ni ṭhin.

Heti taka mahni intihhlum an tam takah chuan kan chhungkaw inenkawl dan, kan khawtlang inkaihhruai dante leh kan inchhun luhna ber pakhat kohhrana kan kalphungte thleng hian a ṭul angin zir chiang ila a ṭha ngawt mai. Mi nuai 10 vel lek cheng si hetiang taka ruihhlo bawiha tang, nawhchizuar leh mi beidawng kan nei tam ta ringawtte hi zir chian tham a awm a, 'chhungkaw kehchhia' tia puh fai vek lo hian chumi phenah chuan zir chhuah tur hi a awm thei ngeiin a rinawm.

Engpawhnise mahni intih-hlum duhna nei zawng zawng an intihlum vek lo a, mi tam tak chu chhanchhuah an ni a, rilru harsatna neite tana tluk luhna tur sorkar damdawi-in, hnathawktu leh ṭanpuitu mi ṭhahnem tak an awm a, tlawmngai pawl leh kohhran lam pawhin hetiang mi hi an nei bawk a, hengte hi inkawhhmuha sawi pun zel a
ṭha khawp mai.