Land reform

New Economic Development Policy (NEDP) hnuaia Land Reforms Committee chu tun hnai khan an inhmu khawm a, Mizorama land ceiling siam dan tur te, ram hmasawnna project leh chenna in tur hmun ruak awm loh ṭhin vanga harsatna chinfel dan tur te, V/C pass hmanga ram zau tak tak mimal hnena pek sorkarin a pawmpui loh leh chhiah chawi loh chungchang te, mimal ram zau tak tak nei hmang ṭangkai si lo chungchangte leh, VC-te'n ram an pekte chhinchhiah tura hmalakte an rêl.

Tun dinhmuna Mizoramin a ma-mawh ber pakhat sawi dawn ta ila, mi ṭhenkhat chuan land reform hi an thlang hial ang. A nei leh thei apiangin an duhna hmun apianga an duh duh zat ram an neih theihna state kan ni hi a pawi a, tun hma aṭang tawhin inrelbawlna leh inkaihhruaina awm lo ang maiin ram kan inpe a, a tlang leh mual tawpa ram neite an awm a, tunah hi chuan Mizoram kil tina hmun ṭhalai hi chu mi hausa khawpuia chengte ram deuh vek a ni ta.

Ram neih theih chinah bithliah a awm loh avangin pawisa nei deuhin ram awl apiang an lei zel a, sorkar tan project lian deuh bunna tur ram awl pawh awm mang lo khawpin kan ram hmun
ṭha hi mi hausa kutah a lut zo tawh a, a pawi hle. Hei hi tuna tihtawp a nih loh a, tun ang zela kum 10-te a vei leh ngat a nih chuan Mizoram hi Mizote ram ai mahin 'Mizo hausate ram bik' ang mai a chang zo ang.

Tunah hi chuan miin chhiah a pek theih phawt chuan a duh zat zat ram a valh thei a, thingtlangah Village Council-in ram zau tak tak mimal hnenah an pe a, hengte hi khawpuia mi hausa kutahte a lut leh a, thingtlang hmunhma rem deuh pawh khawpui mi hausate ta a ni zel.

Thingtlang pain sum ma-mawhna avangin khawpui mi hausa kutah ram a hralh a, ram dang a neih loh avangin ama ramah vêk a inhlawh lêt leh a, hei hi kan ram dinhmun dik tak a ni. Sorkar hian Land Reforms Committee hi rûn dâlah lek din lo se, hnathawh tak tak tumin ṭan la se, huaisen taka land reform hna an thawk a nih chuan khuareiah fak an la hlawh hle ang.