Assembly session-ah fimkhur a ngai

Mizoram State Legislative Assembly pakuana ṭhutkhawm vawi lina, budget session ni bawk chu nimin khan ṭan a ni ta a, ni 14 chhung awh tur niin, March 20, 2025-ah zawh a ni ang. Finance changtu Chief Minister-in March 4 khian kum 2025-26 Mizoram budget a pharh dawn.

Pathian hruainaa Mizoram budget session ṭan a ni leh ta hi a lawmawm. MLA-te zingah session-a tel theih loh phahna tur khawp dam lohna leh harsatna nei an awm lo niin a lang a, hriselna ṭha neia session-a an tel thei hi a lawmawm. Ṭha tak leh tluang taka hun an hman tluan ṭheuh Mizoram mipuiin kan duhsak a ni.

Kum eng emaw zat kal ta aṭang khan Assembly session hi television-ah live telecast-a pek chhuah ṭhin a ni a, TV firm hrang hrangin YouTube-a an channel ṭheuhah live-in an tichhuak tel bawk ṭhin. Hei vang hian session hi fehna leh ramkalna aṭang pawhin en theih a ni tawh a, mi tam takin an en ṭhin rêng a; hetiang taka awlsamna kan nei ta pawh hi a lawmawm.

Session hi live-a en a awlsam tawh avangin tunah chuan Mizoram mipuiin kan en nasa tawh a, tun hma zawng aiin mipuiin an ngaihven tawh zawk ni pawhin a lang. IT lama hmasawn zelna avangin TV leh phone hmanga session laite record chhawnna a awm ṭha tawh hle bawk.

Awlsamna hrang hrang avang hian Speaker, minister-te leh MLA-te pawh an fimkhur tial tial a ṭul a, ṭawngkam pawh an uluk a ṭul zual ta hle. MLA dangte leh mipui tana ngaihthlak nuam lo thei ang chi ṭawngkam mawi lo hman loh hram a ṭha hle.

Session-ah hian inhnial fo a, tun ṭumah pawh an inhnial leh ngei dawn; mawi lo khawpa ṭawngkam nei lo tur leh che lo tura an insûm a ṭha. House chhunga an che vel hi mipuiin an lo thlir reng a ni tih hria a, mipui hmaa mualphona tur leh an politics zinkawng atana pawi thei zawnga che lo tura fimkhur hle a ṭul ngei ang.