Mizo hnam a him em?

January-May, 2015 chhungin Champhai district chhungah HIV hrik pai mi 44 hmuh chhuah belh an ni tih tun hnaia District Level National AIDS Control Programme inhmuhkhawmnaah tarlan a ni.

MSACS website-a tarlan danin kum 1990 October aṭanga kum 2014 Octo­ber chhungin Mizoramah HIV hrik pai 9,637 hmuh chhuah tawh an ni a, hengte hi thisen enfiah tawh mi 2,97,375 aṭanga hmuh an ni. Mizoram mipui zawng zawng hi an thisen enfiah theih ni ta se, HIV hik pai hi mi tam zawk an awm ngei ang.

HIV/AIDS hi mipui nawlpui hian hmelhriat tawh mah ila, a hlauhawmna leh a inven dan lam hi kan la hre chiang tawk lo a ni mai thei a, a hrik pai hmuh chhuah belh zel an ni. Tun ang zela kan kal chuan Mizoram chhunga chengte dinhmun hi a him lo hle tih a lang chiang a, mipui nuai 10 bawr vela heti zat HIV hrik pai an awm hi a vanduaithlak hle a ni.

Heti taka HIV-in min tihbuai tawh thu hi kan zavaia kan pawm tlan a ngai a, sorkar hian hre chiang tawh bawk mah se pawisa a neih loh avangin HIV dona hi an kal chakpui tawk thei lo. NGO lamin theihtawp an chhuah a; nimahsela hnathawktu an in­daih lo a, sum lamah harsatna an tawk bawk a, an hna a chak tawk thei lo.

Mizoramah chuan kohhran hian thil a titheiin a ṭang­kai a, a aw pawhin zawmtu a ngah ber anga chhal ngam a ni. Mizorama kohhrante hian HIV/AIDS hi kan ram leh hnam himna khawih pawi thei khawpin a hluar tawh a ni tih pawm se, Mizoram chhan turin kohhran lam hi a harh thar a ngai a, HIV/AIDS do kawnga ṭhan harh hi harhna ṭangkai tak a ni ngei ang.