Nunah a takin lang chhuak rawh se

February 20 kha Mizoram State Day a ni a, hmun hrang hrangah State Day of Prayer hman a ni. ZPM party-in Mizorama sorkarna an chan hnuah State Day of Prayer hi nikum 2024 khan hman ṭan a ni.

Nikuma State Day of Prayer hman a nih khan ṭul titu leh ṭul ti lo an awm a, kuminah pawh an awm. Ṭul ti leh ti lo hi chu political party mi zingah chuan awmna party-ah a innghat viau. Chutih rualin, party-a awm lo leh àwn lam nei lo zingah pawh ṭul ti leh ti lo tam tak an awm ve ve bawk àwm e.

Mihring zingah sual nei lo kan awm lo a; ti sual ṭhin, che sual ṭhin kan ni. Sim tur nei leh insiam ṭhatna tur nei vek kan ni a; sual thupha chawina tur nei vek kan ni. Chuvangin, state pum huapa a huhoa ṭawngṭai rualna hun buatsaih hi tih àwm tak a ni.

Inkhawm hi thil ṭha a ni. Inkhawm hi mi zawng zawng tan a ni a, mahse, mi zawng zawng an tel kher lo a; tel duh leh duh lo te, tel ṭul ti leh ti lote an awm ṭhin. Ṭha leh ṭul ti lo an awm avanga tih loh tur a ni lo. State Day of Prayer pawh hi ṭul ti lo awm bawk mah se, thil ṭha a ni kan ti thei ang.

Thil ṭha kan hria a, chungte chu tih kan tum tur a ni a, chumi atan chuan eng emaw tih a ngai ṭhin. Chutih rualin, thil ṭha tihnaah hian tih fuh loh deuh te, famkim tâwk lote pawh a awm ṭhin bawk. Duhthusam loh deuh thil a awm avanga tih loh phahna tur erawh a ni lo.

Political party mite zingah politics-a khingpuite tihchhiat tum a, thil ṭha an tih pawh sawi chhiat tum ngar ngar an awm; hetiang hi a ṭha lo a, Mizo zia nen pawh a inhmeh lo. Miin thil ṭha an tih na nâ nâ chuan sawiselna tur zawng ngar ngar ṭhin nih loh a ṭha.

State Day of Prayer hi buatsaih a nihna ngawr ngawrah kan duhtawk mai tur a ni lo a; mi hmuha lan mawi tumna mai a ni tur a ni lo. Buatsaih a nih chhan ang tak leh ram mipuiin an beisei ang takin State Day of Prayer-a kan thil tihte kha kan nun leh thil tihah a takin lang chhuak ngei rawh se.