Sawhthing lei zawh vek ni se

Mizoram sorkar chuan February 20, 2025 khan hmun hrang hrangah kut hnathawktute sawhthing thar a lei ṭan ta a, a ni khatnaah quintal 7,800 chuang lei niin, lei chhunzawm a ni mek.

Sawhthing lei tur hian thuneitute chuan district 11-ah sawhthing hralhna tur primary collection centre ṭhahnem tak bakah, hmun thlan bikah secondary collection centre 54 an ruahman a ni.

Sawhthing hi kg. khat Rs. 50 zelin sorkarin a lei a, sawhthing man chu collection centre aṭanga phurh chhuah a nih aṭanga ni sarih chhunga tihfel hman tum niin, direct beneficiary transfer hmangin sawhthing neitute bank account-ah thun tura ruahman a ni.

Sorkarna chelh mektu party hian inthlan dawnah thlai chi li an lei tur thu an sawi a, hei hi sorkarna chang tura mipuiin an thlan chhan lian tak pakhatah ngaih a ni. Sorkarin lei tura a thlan thlai chi li zingah pawh sawhthing hi chingtu tam ber leh mite ngaihven ber a ni hial àwm e.

Inthlan dawna intiamnate sorkar hnua tihhlawhtlin a nih loh hian a ngeiawm a, a thinrimthlak a, sorkarna chelh tlak lo zia a ni; tuna sorkarin a intiam anga sawhthing a lei ṭan ta hi a lawmawm.

Chief Minister-in February 18, 2025 khan Mizorama sawhthing chingtute'n an tharte a bo a bâng awm loa an hralh vek theih dawn thu a sawi. CM sawi hi sawhthing thartute tan a thlamuanthlak a; CM-in a sawi ang hian sawhthing thar, hralh tur awm ang angte chu lei vek ni ngei rawh se.

Sawhthing lei leh hralh danah hian kut hnathawktute beisei ang leh duhthusamin thil a kal zung zung kher lo ang, hralh/lei zo vek turin hun pawh a duh deuh ngei dawn. Duhthusam anga thil a kal chak tâwk lo a nih pawhin sawhthing neitute'n dawhtheihna nen ruahmantute thu an ngaihchân thiam a ṭul ang.

Sawhthing leh thlai dang pathum lei leh hralh chungchangah hian sorkar ruahmannate sawisel tum ngar ngam, sawiselna tur zawng char char an awm ve bawk a; mi ṭhenkhat chuan sorkarin lei tura a intiam thlaite hi lei thei lo se, sorkar mualpho se an ti rilru pawh a ni mai thei. Hengte avang hian sorkar hi a ṭan lehzual a ngai a, hralh lehna a awm emaw, awm lo emaw, lei tura an intiam tawhte chu an lei vek tur a ni.