Lirthei intlan chhawk

Home minister hoa ṭhu­khawm Traffic Management Committee chuan, Aizawl khawpuia lirthei tawt lutuk tihziaawmna turin lirthei intlanchhawk an rawt a, mipui ngaihdan lak an tum. Lirtheite hi number inkawp kim leh inkawp kim loa intlanchhawktir an rawt chhin a ni.

Tun ang zela thil a kal chuan Aizawl khawpuia lirthei tawt avang hian nunphung a khaihlakin hun leh tha tam tak khawhral ṭhin a ni. Lirthei a pung zel a, kawngpui a zim si a, thuneitu lamin ngaihtuahna hrang hrang an hmang tawh a, Aizawla traffic jam erawh a ziaawm hleithei lo.

Mahni duh hunah kan duhna kan thleng hleithei lo a, traffic jam-a Aizawl mipuite hun paih hi a tam a, hei hian ram hmasawnna thlengin nghawng a nei lo thei lo. Traffic jam tihziaawm dan hi ngaihtuah zel a ngai a, tuna rawtna pawh hi a ṭha fu awm e.

Rawtnaa a lan dan chuan ni khat danah zel lirthei hi an tlan chhuak dawn a nih hmel a, hei erawh hi chu ennawn deuh a ṭha mai thei. Number inkawp kim leh inkawp kim lo ringawt en lo hian, number hi 0 aṭanga 9-a tawpte hi ni khat zel indin chhawk ta se, lirthei hi ni 10 danah vawi khat zel an ding dawn tihna a ni ang.

A ni kar thlaka din zel hi chu lirthei neite tan a buaithlak lutuk palh thei a, number tawpna zela a indawta indin chhawk hian ni 10 danah vawi khat zel an ding dawn tihna a ni. Hei hian lirthei neitu lamah harsatna a thlen vak lo ang a, traffic jam tiziaawm tur khawpin lirthei ṭhahnem tak an ding dawn tho a, lirthei neitute tan a pawm a nuam zawkin a rinawm.

Traffic Management Commi­ttee rawtna hi zahawm viau mah se ni khat dan zela ding tura intlanchhawk hi chu lirthei neite tan a buaithlak deuhin a rinawm. Hei vang hian lirthei intlanchhawk tho si, a khât deuh zawka intlanchhawk hian kawngpui tawt lutuk chu thui tak a veng thei thoin a rinawm a, ngaihtuahna thar nen kalpui se a ṭha zawkin a rinawm a, lirthei neitu lam tan pawh pawm a nuam deuh ang.