Hna lak dan fel lo bawk

Aizawl district-a Employment Exchange (EE) office chuan State Institute of Rural Development (SIRD), Kolasib-in tun hnaiah Employment Exchange kaltlang loa hna thawktu an lak avangin insawifiah turin September 5, 2016 khan hriattirna (show cause notice) an pe.

Mizorama thil buaithlak tak mai chu dan loa hna lak a ni fo hi a ni a, hei hi sorkar hian a titawp thei lo. Tun thleng hian sorkar department hrang hrangah hian sawipuitu neih
ṭhat vanga hna lak hi sawi tur a awm nual a, Congress-in sorkarna an chan hnu pawh hian a la reh lo.

Dan ang chuan contract-a hnathawk tur pawh ni se Employment Exchange kal tlang ngei tur a ni a; central leh state sorkar hnuaia awmte chu autonomous body pawh ni se, 'Employment Exchanges (Compulsory Notification of Vacancies) Act 1959' Section 31 angin sorkar hnuaia thla thum aia rei thawk tur reng reng chu Employment Exchange kal tlanga lak vek tur a ni.

Mizoramah ṭhalai lehkha-thiam hna hmu lo ṭhahnem tak an awm a, heng mite hian an tum ber pakhat chu sorkar hnuaia hna awm thei ang ang thawh hi a ni. Tunah chuan master degree nei pawhin sorkar hna a nih tawh phawt chuan tun hmaa hna hniam deuh nia ngaihte thlengin an thawk hreh tawh lo a, hna inchuh a na tawh hle.

Hetiang din-hmuna ka din tawh hnua sorkarin EE lam ngai pawimawh loa thil a ti leh ṭhin hi a fel lo a, tuna SIRD thilah chauh ni lo hian, department hrang hrang hnuaiah contract-a hnathawk tur mi hriat loha lo inthun mai maite a la tawp lo. Mizo ṭhalaite hian dan dik taka hna inchuh hi an phu a, a tling leh thiamte chauh lak a nih chuan an phun lo a, hmelhriat neih ṭhat vanga hna lak awm
ṭhin hi tihtawp a hun tawh e.