Bána Kaih hnuaia progress partner

Mizoram sorkar flagship programme – Bána Kaih (Handholding) scheme hnuaiah a thawh khat nan progress partner ni tura dilna department 15 kaltlangin 11,430 a lut a, chu'ng zinga 520 chu sorkarin hmalakpui tlakah ngaiin, February 21, 2025 khan an endik.

Thawh khatnaa thawhpui tlaka ngaih 520 chu dilna lut zawng zawng aṭangin 4.55% a ni a; an dilna (DPR) hmanga loan an dil zat belhkhawm chu Rs 61,30,72,748 a tling.

Sorkar hotute'n an sawi tawh ṭhin angin, Bána Kaih hnuaia sorkar nena thawh dunnaa inṭanpuina tur hi a thlâwna pawisa inpek tawp ang chi a ni lo a, rulh leh ngai a ni dawn. Hei hi ṭanpuina dawngtu (progress partner)-te'n an hriat chian hle a ngai.

Tun hmain sum faia ṭanpuina inpek tawp ang chi Mizoramah kalpui a lo ni tawh ṭhin. Sum faia inṭanpui tawp ang chi hi mi ṭhenkhatah chuan a ṭhatna a awm ngei ang a, mi tam berah erawh chuan a ṭha lem lo a ni tih a taka hmuh theihin a awm.

Bána Kaih hnuaia puih turah hian thuneitu, mawhphurtute an fimkhur hle a ṭul. Mahnia kutkawih eizawnna kawng zawh tura theihna nei ṭha si, mahse, sum leh paia harsat vanga kal hlei thei si lo an awm a, chu'ngte chu puih âwm tak an ni thei. Mamawhtu dik takte puih an nih theih nan fimkhur tak chungin taima taka endik zel ni rawh se.

Ṭanpuina loan dawng tura thuneitute'n an thlante lakah sorkarin beiseina sang tak a nei ngei dawn. Sorkarin a beisei ang leh a puih chhan ang taka ṭanpuina an hlawhtlinpui theih nan theihtawp an chhuah tur a ni a, an zûzîsan mai mai tur a ni lo. Sum an pûk pawh ṭha takin an rûl tur a ni.

Bána Kaih hnuaiah hian ṭanpuina duh zawng zawngte ṭanpui vek theih an ni dawn lo tih chu chiang sa a ni. Thuneitute'n an thlan loh zinga mite pawh hnual nghal mai loin, beidawng mai loin hlawhtling turin kawng dang an zawn zel a pawimawh. Beidawng loa taima leh rim taka an beih phawt chuan, ṭanpuina loan late ai maha hlawhtling a nih theih tih hriat a ṭha e.