Krismas leh Kumthar chibai

Vawiin, December 23 hi kum 2020 chhunga Vanglaini chanchinbu chhuah ni hnuhnung ber a ni a, Pathianin rem a tih chuan kum 2021 January 5-ah chhuah chhunzawm tur a ni. Krismas leh Kumthar chawlh chhung hian Vanglaini website www.vanglaini.org lamah tuk tin dar 5:00-ah chanchin thar tihchhuah ṭhin a ni thung ang. 

Kum 2020 hi chhan hrang hrang avangin kum hriat­reng hlawh tak a ni dâwn a, hri lêng avanga khawvel a buai kum a ni. He hri hian Mizoram pawh nasa takin a tibuai a, hei hian chanchinbu eizawnna pawh khawvel pumah a nghawng na hle. 

Khawvel hmun dangte ang bawkin Mizoramah pawh hun rei tak chhung dan pangngai angin chanchinbu a chhuak thei lo a, chu chuan Vanglaini pawh nasa takin a nghawng. Aizawl chhungah ngei pawh chanchinbu sem luh an phal lohna vengte an awm a, thing­tlang hmun tam zawkah a phurtu lirthei an kal theih loh avangin chanchinbu thlen chhuah theih a ni lo. 

Hetiang harsatna karah hian Vanglaini chu kum tluanin a chhuak thei zel a, chan­chinbu sem chhuah theih loh lai pawhin PDF tala siam niin a thlawna thawn chhuah ṭhin a ni. Engpawhnise he kum hi tunah chuan a liam dâwn ta a, kumthar hun nuam leh hlim­awm zawk kan hman ngei beiseina nen i thlir tawh ang. Vanglaini chanchinbu chhiartu zawng zawngte Krismas leh Kumthar chibai kan buk a che u.