Mizoram State Lottery

Mizoram sorkar chuan December 2019 aṭang khan kalphung tharin Mizoram State Lottery a kalpui ṭan a; Institutional Finance and State Lottery (IFSL) hotute sawi danin kalphung thara kalpui a nih hnu hian cheng vaibelchhe 45 vela hlâwk zawk an inbeisei thu an sawi. 

State lotterry kalphung hi Mizo­ram mipui tam zawk hi chuan kan hrethiam chiah lo a, lehkhathiam kan tih zingah pawh a ngaihna hre vak lo tam tak a awm theih ang. A department-a thawktute leh he lama bengvar fal lo tan chuan hriatthiam loh theih tak a ni. Chutihlaiin politics-a thu inchuh awm ve rengna a ni hian lotterry-a sum che vel tamzia chu a tichiang mai awm e. 

Finfiahna tak awm thei si lo hian lottery kalpuitu tur thlan danah hian sawi neuh neuh a awm reng a, kan sorkar hotu lute hian duhsak zawng an neia inpuh tawnna lian tak a awm ṭhin. A sum che vel a ṭha­hnem tham si a, tute tan pawh thlemna a lian ang tih a rin theih a, politician-te leh sorkar thuneitu lam pawh an fimkhur a ṭulna hun leh hmun a ni ang. 

Hetihlai hian lottery hi thiam taka kalpui chuan thawh chhuah sawi tham nei lo Mizoram tana sum thawh chhuahna hnar ṭha tak a tling a, tuna hlawk zawka kalpui tura ruahmanna awm pawh hi thil lawmawm tak a ni. Mizoram State Lottery kalphung thar hi tluang takin kal se, sum leh pai lakluhna nei chau tak Mizoram state tan sum ṭhahnem tak luhna hnar lo ni zel rawh se.