Vaihlo do

Mizoram State Tobacco Control Society (MSTCS) huaihawtin tun hnai khan Mizoram Anti Tobacco Day vawi thumna hman a ni a; he huna khuallian chief minister Lal Thanhawla chuan, zûk leh hmuam ṭhat lohzia chu pulpitah sawi tam ni se a duh thu a sawi.

Zuk leh hmuam do hi Mizoramah thawm ring tak nen kalpui a ni a, a sawt pawh a sawt chho hle. Tun hmaa puipunnaa hrehawm khawpa meizial an zu khu luih luih ang kha tunah chuan a awm ta meuh lo a, khawpuiahte phei chuan mei zu mi an inthlahrung thiam tawh a, midang tana hrehawm tur khawpin mei an zu ta meuh lo.

Hetihlai hian zuk leh hmuam kaihhnawih harsatna tam tak chu Mizoram hian a la tawk reng a, zuk leh hmuama kan senso tamzia leh chumi avanga natna kan kai inenkawlna man tamzia hi chhut pawh chhut thiam a harsa hle. Vaihlo khaihhnawih natna hi kan vei nasa a, a tihtawp dan ṭha ber chu vaihlo tih loh hi a ni. Vaihlo ṭhat lohzia leh a hlauhawmzia hi tun aia nasa zawka kan inzirtir chu a ṭha hle.

Hetihlai hian zu rui khuakhirh tur hian sorkar lam hian ṭan an lak tel a ngai a, bazar leh sorkar office-a meizu an vai peih ang tho hian an tih ve a ṭul. Sorkar phalnain zu an zuar ta a, zu rui chunga office dawr mai mai te, zu rui leh zu nam chunga office kaite pawh sawi tur an awm a, puipunna hmuna zu ruite pawh hmuh tur an awm
ṭhin. Hemi kawngah hian Mizoram sorkar hian ṭan a lak a ngai a, vaihlo do tura ke a pen ang tal hian ṭan la thei se a duhawm hle.

Vaihlo avanga kan ramin a tawrhna, kan insensona leh harsatna kan tawh zozaite chhut hian, vaihlo hi kan ram hmelma lian tak pakhat a ni tih pawm ila, a do turin i ṭangrual zel ang u.