Zu

MNF party chuan tun hnai khan district khawpui hrang hrangah 'Zu zawrh duh lohna kawngzawh' an huaihawt a, MNF president Zoramthanga chuan, zu chu Mizoramah tihrêm vek theih an inrin vanga khap duh an ni lo a, sualna tipungtu a nih vanga duh lo an nih thu a sawi. Hetihlai hian Home Minister R Lalzirliana chuan, zu tihbo vek chu an duhthusam a nih thu leh, a bo vek theih si loh avangin awmze neiin an zuar ta zawk niin a sawi ve thung.

Zu chungchangah hi chuan ngaihdan inang lo lian tak pahnih a awm sa a, chu chu zu zawrh mai duhtute leh zu zawrh ṭha ti lote an ni. A zu hrim hrim han fak mawi emaw, a zu ṭhatna sawi tur hria erawh an awm lo a; nimahsela zu hi tihbo tuma ṭanlak pawhin a bo hleithei lo a, tunah phei chuan sorkar phalna nen an zuar ta hial a ni.

Zu a nih tawh chuan ngaihdan hi a phir sa tawh a, tunah phei chuan politics thil angin a kal tawh a, ngaihdan hi a inpersan nasa leh zual tawh ang. Politics aṭanga thil kan thlir tawh chuan zu zawrh duh ngai lote pawhin zawrh law law mai a ṭhatna an hre ṭeuh a, zu in ve ṭhin meuhte pawhin zu zawrh ṭhat lohzia sawi tur an hre ve bawk.

Zu hian kum 2018 MLA inthlanah nghawng a nei dawn nge dawn lo hriat ni lo mah se, zu hi chu politics-a inchirhtheh tawnna a ni reng tawh dawn tih a hriat theih. Inthlan zawhah zu zawrh duhtute an chak emaw, an chak ta lo emaw pawh ni se, inthlan result avang hian khap hneh theih si loh ai chuan zu zawrh law law mai hi a ṭha ta tihna emaw, a ṭha lo hlei hlei tih tehna a la tling dawn chuang lo. Hetiang thilah hi chuan ngun taka zirbingna (research) neih hmasak hi a finthlak a, kan ram kal zel dan tur thui tak hril theih a nih vangin, zirchianna neih hi kan uar deuh deuh a ṭha ang.

Zu hi kan duh emaw duh lo emaw politics-ah an chhung lut tawh a, inthlan lo awm tur thlengin thu inchuh lianpui a ni zel dawn a nih hmel e.