Pollution control

Mizoram Pollution Contriol Board (MPCB) chuan tun hnaiah pollution chungchanga inràwnkhawmna an buatsaih a, Mizorama pollution siamtu hrang hrangte'n hriat loh hlâna taksa leh boruakah harsatna a siam tawh dante sawiho a ni.

Mizoram hian bawlhhlawh kan hmelhriat dan hrim hrim pawh hi kan thlak a ngai tawh a, kan hnawmhnawk leh duh loh paih khawm ringawt hi bawlhhlawh a ni lo a, bawlhhlawh nia kan ngaih loh min tibawlhhlawhtu tam tak a awm. Heng thil kan ngaimawh leh ngaimawh loh hian kan nunah nghawng lian tak a nei lèt thei a, kan hriselna leh nun khaw nawmna thui tak a hril.

Tui, boruak, damdawi-in leh chhungkaw bawlhhlawh, bengchheng, plastic bawlhhlawh leh a dangte titlêm turin dân kan nei vek a. Heng dante hi uluk taka duan ni mah se, kenkawh a nih loh avangin kan tuar ṭan mek a ni. Mizoram hmun ṭhenkhat, a bikin Aizawl khawpui phei hi chu a boruak pawh a bawlhhlawhin a thianghlim tawk tawh lo a, damdawi-in thli sawngbawl dan phei hi chu duh thu a sam lo takzet a ni.

Khawpui bawlhhlawh paihna hmun berte hi chinfel a ngai hle mai a, a bula chengte tana harsatna a thlen chu sawi loh zin veivakte tan pawha harsatna thlen thei khawpin meikhu a chhuah a, hengte hi thuneitu lamin an vil ngun a ngai hle a ni.

Polythene leh a kaihhnawih thil kan khuahkhirh loh avang hian harsatna lian zawk kan tawk mai ang tih a hlauhawm a, inven theih hunlaia inven thiam hi a pawimawh khawp mai. Pollution veng tur hian tun aia kan ṭan tlan a ngai a, Mizoram Pollution Control Board lam pawhin ṭan la zual se, Mizoram a lo thianghlim zel theihna tura ṭanlak hi a ṭul takzet a ni.