Kawngpui vil

Tun hnaiah Mizoramah ruah a sur nasat avangin hmun tam takah lei a min a, inkal pawhna hmun tam takah a ping. Sorkar thuneitu lamin theihtawp chhuahin a thenfai hna an thawk nghal ṭhin a, ruahsur hnuaiah zanlaiahte pawh a ṭul chuan hna an thawk mai ṭhin.

Kumina Mizo-rama ruah tui tlak dan hi hriatthiam a harsa a, September-ah ruah a tlak tam avangin hmun tam takah chhiatna a thleng. In chim leh lei min avanga nunna chân hialte an awm a, kawngpui pawimawh tam tak chu a ping bawk a ni.

Kawngpui thianfai tura sorkarin ruahmanna a siam dan hi a fakawm a, kil tin aṭangin a rang thei ang berin kawngpui a pinna hmun hi an pan a, sum neih sa awm lo mah se mipui mamawhna a san avangin lei min thenfai hna hi an thawk ṭhin a ni.

Mizorama thil fel hleithei lo chu kawngpui vil zuina tura sum a awm lo ṭhin hi a ni. Phai ramte ang a ni lo a, kawngpui hi siam zawh aṭanga a chhuat a chhiat hma dah ngawt theih a ni lo a, kawng chhak lam a min emaw, a chhuat bal zawnga a min emaw a nih chuan siam ṭhat a ngai ṭhin. Hetiang chhiatna a thlena siam maina tur sum hi sorkar hian a nei lo a, a remchang a piang a pawt khawm mai niin an sawi.

Tuna Mizoram kawng tam tak hi chu tlem te tea thuam ṭhata la chhan theih mai an ni hlawm a, fur a zawh meuh chuan a chhe nasa tawh hle ang. A siam hunlaia siamna tur sum a awm loh avangin a chhiat rak thleng sorkarin a nghak a, chutah sum a awm hunah a siam leh chauh ṭhin a, kawngpui a tlo loh phah a ni.

Sorkar hian sum a nei lo chung hian mamawh zual bika hman theih tur hi dah hrang thei se, ṭul buk thila hman theih turin kawngpui thuamna turte hi dah hran dan ngaihtuah se, kum tina ruahtui tlak laia kan harsatna a nih avang hian project hranpate pawh siamin inralrin theih a nih a rinawm a; kawngpui humhalh tur leh thuam ṭha zel turin sorkar hian ke pen rawh se.