Dan bawhchhiate lakah khauh a ṭul

Aizawl Traffic Police-in tun hnaiah chanchinbumite pualin Traffic Awareness Programme an buatsaih a; lirtheia chetsualna thleng dinhmunte tarlan a nih bakah, lirthei dan hrang hrang leh dan bawhchhiate hrem dante tarlan a ni.

Traffic SP chuan lirthei tidanglama khu chhuahna (exhaust pipe) ring chi vuahte chu Rs 10,000 chawitir theih a ni a, exhaust pipe ring chi vuah chungchangah ṭan an lak thar dawn thu leh an khauh (strick) chhoh dawn a, an chawitir zel dawn thute a sawi. Lirthei khalh chunga phone hman chungchangah khauh an tum thu leh Rs 5,000 thleng chawi theihna a nih thu a sawi bawk.

Two wheeler-a ri ring chi vuah leh lirthei khalh chunga phone hman chungchanga khauh an tum thu leh, mana pawisa chawitir zel an tum thu Traffic SP-in a sawi hi a lawmawm a, mipuiin ṭha an tih ngei a rinawm. SP-in a sawi ang hian traffic police-te'n a tak takin khauh takin kengkawh se, dan bawhchhiate manin, pawisa chawitir zel se a ṭha hle ang.

Two wheeler-a ri ring chi vuah chungchangah hriattirna/thupek chhuah a lo ni tawh ṭhin a, traffic police-te'n tam tham tak an man tawh. Mahse, tun thlengin Aizawl khawpui chhunga exhaust pipe ri ring chi hmuh tur leh hriat tur a la awm reng a, hei hian traffic police-te hmalakna a la tâwk zo lo tih a tilang.

Lirthei khalh chunga phone hmang pawh hmuh tur a tam hle, traffic police-te pawhin khawlaia duty reng an nih angin an hmuh fo a rinawm. Mahse, heti taka Aizawla lirthei khalh chunga phone hmang hmuh tur an tam hi man loin an en liam mai ṭhin vang a ni thei àwm e.

Lirthei chung-changa khapna leh hriattirna thupek chhuah a lo ni tawh ṭhin a, bawhzuitu turte'n ûm zui ve bawk mah se, a rêm hlei thei lo. Thuneitute an ṭan lehzual a ṭul niin a lang.

Dan leh thupek bawhchhiate man loha en liam mai ṭhin hian dan loa thil tite an tihuangtau a, a tipunlun ṭhin. Chuvang chuan dan bawhchhiate chu dan ang taka mana hrem ṭhin a ṭul a; lirthei dan bawhchhiate lakah pawh traffic police an khauh a, en liam mai loa an man a, an hrem zel a ngai a ni.