Ram inpek

Land Revenue & Settlement Department hotute chuan, V/C tam takin dân an hriat loh vanga ram an pek mai ṭhin avangin chinfel a hautak thei hle tih an sawi. LRS department hotute chuan, "Mizoram hmun hrang hranga V/C-te'n an khua ṭheuha mipuite hnena ram an pek danah ram pek theihna dân awm lo chunga an pek ṭhin vang te, ram inpek thuah a tam vang leh ram an pek dân chhinchhiah ṭhat tawk loh vang leh chhan hrang hrang vangin ram buai a tam phah hle," an ti.

Mizorama ram neih leh inpek dan hi thil tih fuh tawk loh tam tak a awm a, mi tam takin harsatna an tawh zui phah. V/C ram pekte hi mi tam zawk chuan dan ang thlapa inpek angin ngai mah se la, dan aṭanga thlir erawh chuan ram inpek dan dik a ni lo a, an awmna khua azir leh an inpek dan azirin dan dik leh dik lo a awm thei.

Ram inpekah V/C-te hian dan angin thuneihna an nei lo a; nimahsela VC tam tak chuan ram an pe tho a, heng an ram pekah hian Revenue dân aṭang chuan hmalak theih a ni lo. The Mizoram Land Revenue Act, 2013-in a sawi angin, V/C-te'n danin a phal piah lamah ram lo pe ve mah se, dân aṭanga tehin ram neitu (land holder) an ni lo.

Tunlaiah khawpuiah leh thing-tlangah pawh ram hlutna a pung zel a, ram lei leh hralh pawh a awm zel. Ram leitu tam takte hian 'V/C pass' an tih mai village council lamin ram an pekna hi an inhlan chhawng mai thin a, dan aṭanga thlirin chenna in tur ni loah chuan ram inpek theih a ni bawk si lo a, thil chin fel ngai tam tak a awm niin a lang.

Mizo mipui tam zawk hian ram neih dan hi kan hre mumal lo a, thingtlangah pawh V/C te ngei ngei pawhin an thuneihna chin pawh an hre vak lo. Thil pawimawh tak a nih bawk si avangin ram inpek dan, ram hralh chhawn leh lei chungchangah hian thuneitu lamin mipui zirtirna ṭha zawk pe thei se, ram inpek, ram lei leh hralha buaina tam tak hi chu chin fel theih a ni ngei ang.