Hunpui leh Covid-19

Health minister Dr R Lalthangliana chuan, Krismas leh kum thar vuakvêtah picnic leh a huhoa thil tihkhawm dangte ti lo turin mipui a ngen.

Krismas kan hnaih ta hle a, kumin chu Mizote hriat phak china Krismas danglam tak kan hmang dan a, Kristian kan nih hnua a ram puma biak-ina inkhawm thei loa Krismas kan hman hmasak ber tur a ni awm e. Inkhawm theih loh mai ni loin Mizo Kristiante Krismas lawmnain a ken tel tlat ruaitheh pawh a theih dâwn loh a ni.

Hetihlai hian Covid-19 hri kai darh theihna awlsam tak nia an sawi thianho, chhung khat hnai thil tih khawm leh châw ei khawmna hun remchang tak a inhawng a, sorkarin ngenna siamin a khap theih chin chin khap mah se, a pawimawh ber tur chu mimal tinte fimkhurna a ni ang. Sorkar chuan thupek a chhuah thei a, ngenna pawh a siam ṭhin a, nimahsela a taka a hlawhtlinna chu mipuite rilru put hmangah a innghat thui hle.

Kan hun pui pawimawh takah kan tih ṭhinte a tih theih loh a, inkhawm leh ruaitheh hial pawh kan thulh laia chhung hnai, thianho, pawl bil leh thenawm khawveng puala programme siam chawp lo neih hi thil inhmeh lo tak a ni ang.

Hun rei tak chhung kan inkhungin kan inveng tawh a, mi tam tak eizawnnain a tawrh phah hial khawpin Covid-19 dona kawngah kan ṭang tlâng tawh a; he hunpui lo thleng turah hian Mizoram mipuite Covid-19 a tai darh theihna tur kawngin khawsa lo hram ila, theihtawpa fimkhur chungin he hunpui hi i hmang ang u.