Ruihhlo zuar

Central YMA hnuaia ruihhlo do pawl, SRS-te chuan Aizawla ruih-hlo zuartu hlun tak pakhat chu tun hnai khan heroin nen an man a; he mi hi ruihhlo kaihhnawihah ṭum nga man a ni tawh a, a tâng rei ngai lo a, ruihhlo zawrh hi a sim duh lo bawk niin an sawi.

Mizorama thil ngai-mawhawm tak chu thil tisualtute an tâng rei thei lo tih
ṭhin hi a ni a, ruihhlo zuar ngei an mante pawh an tâng rei ngai lo. Hetihlai hian mi hi duh chen chen tantir ngawt theih an ni lo a, an thil tihsual dan azira an tan chin tur awm sa vek a ni a, dan anga thil kalpui a ṭul ṭhin avangin pawn lam aṭanga thlir ang ngawt hi chu a ni ṭhin lo.

Ruihhloin kan ram a tihchhiat dante leh sorkar leh tlawmngai pawl lamin ṭan an lak dante ngaihtuah hian, ruihhlo zuar kumhlun anga hriat theih an han awm maite hi a mak a, vawi tam tak man an tawk chunga an tâng rei ngai lote hlei hlei hi a ngaimawhawm khawp mai.

Hemi piah lamah hian ruih-hlo siamna hmanraw pakhat pseudoephedrine damdawi tawlh chungchangah pawh hian mipui thinlung hi chu a dam lo hle a ni. He damdawi tawlhtu nia rinhlelhte hi man an nih loh vang mai hian mipuiin an ngaidam ta a ni lo a, an mansak ngeite thlenga zalen leh ualau taka an khawsa zui hi chuan mi mit a tikham hle a ni. Thawh chhuahna nena inphu lo khawpa sumdawnna kalpui, in leh lo din leh bungraw ṭha tak tak nei thei an pung zel a, hengte hi pseudoephedrine tawlh avanga lian ta nia rinhlelh an nih vangin mipui chuan an ngaisang tak tak chuang lo.

Ruihhlo zuarte avangin Mizo-ramin nasa takin harsatna a tawk mek a, heti chunga ruihhlo zuarte an tâng rei ngai lo hi mipuiin an ngaimawh tlang a; dan rorelna a nih miau avangin dan hmang veka khing lettu an awm lo a nih chuan ruihhlo zuarte hi an zalen zel dawn a nih hmel a, mipuiin hetiang hi chik takin i ngaihven ṭhin ang u.