Zinna leh a hmuahna senso

Minister of state for Environment, Forest and Climate Change Anil Madhav Dave chuan tun hnai khan zan khat riakin Aizawl a rawn tlawh. Sorkar mi pawimawhte a kawm kual hnuah a haw leh nghal a ni.

Prime minister rawtna angin minister hrang hrangte'n a in-chhawkin hmar chhak state hrang hrang an tlawh ṭhin a, Mizoram pawh hi sorkar laipui minister-te'n a khat tawkin an tlawh ve reng a ni.

Heng minister lo zinte hi dan naranin an lam hnai official tlem tein an rawn ṭawiawm a, an tih tur an tih zawhah an haw leh mai ṭhin. Mizoram sor-kar aṭang pawhin a hmuak âwm rêng minister emaw sor-kar hnathawkin emaw an lo hmuak mai a, ropui taka inlawm a ni ngai lem lo.

Union minister-te lo zin dan hi Mizoram sorkar hian entawn se a ṭha khawp mai. Chief minister ngei hian minister zin inhmuah leh inlawm vak vak kalsan a duh thu a sawi tawh a; nimahsela ama zin haw ngei pawh hi airport thleng thlengin sorkar mi pawimawhte'n an lo hmuak fo a, minister ṭhahnem takin an hmuah chang pawh a awm.

Minister-te zin chhuak hi ṭawiawmtu an ṭhahnem ṭhin a, sorkar official-in an zui leh duah ṭhin. Hetianga inzui duah duah hi lirthei tui man a hek a, thlenna senso a sang a, ei leh inah sum tam tak a kal ral bawk. Minister-te hian private secretary an nei ṭheuh a, hengte hi a ṭangkai thei ang berin hmang se, an zin chhuahnaa sorkar official inzuitir vak lo hian an private secretary lamin a pawimawhte lo chhinchiahin department-ah bawhzui leh mai ṭhin se, inzui duah duah hi sim a hun tawh khawp mai.

Inthlan a hnaih hian sorkar hruaitu lam hian intih lal leh lansarh hi an châk thar ta emaw tih tur a ni ṭhin a; lal tak anga inlantir duhna hi kalsan tawh ila, zin tur inhmuah vak vak leh inzui duah duah hi kalsanin Union Minister-te zin dan ṭhin hi i entawn ang u.