Mipuiin an tiṭha; sorkar a ṭan a ngai

'Covid-19 No Tolerance Fornight' puala thuchah a sawiah Mizoram chief minister chuan "Inenkawl a hautak ṭan ta khawp mai. ZMC-ah ICU khum 17 vel kan nei a, ventilator mamawh an pung zel. Kan ICU khum leh ventilator-in a daih loh damlo serious kan neih a hlauhawm hle. ZMC ICU-ah mi pali an awm mek a, an zinga pakhatin ventilator a hmang. Ward dangah mi 50 awmin, symptom nei mi 21 an awm," a ti.

Chief minister hian Mizo mipuite thawhhona azara Covid-19 dona kawnga kan tihṭhat thu a sawi a. Hetihlai hian tun hnaiah sorkar hotu lamah mipuiin thu an awih loh avang leh mipui an inthlahdah avanga Covid-19 hri darh leh anga ṭawngkam cheh an awm leh zauh ṭhin. 

Mipui hian kaihruaitu an mamawh a, chumi atan chuan ram hruaitu pawh kan thlang a, hruaitu lamin an zir chuan Mizo mipuite chu kaihhruai nuam tak kan ni. Tun hnaia Covid-19 hri leng chungchangah phei chuan Mizo mipuite tluka thuawih, thawk ho ṭha leh sorkar pui ṭha hi India ramah an awm lo ang tih a sawi ngam hial ang. 

Covid-19 hri a ziaawm deuh laia sorkar fak hluak a, sorkar tihṭhat leh sorkar chakna avanga hri do hlawhtling thei dawn dawna inngai a, hri a darh deuh dawna a lan apianga mipui mawhpuh leh daih an awm hi a zialo takzet a ni. 

Kaihruaitu leh viltu an awm chuan mipui chuan an tih tur an tiṭha tawk a, sorkar lamin a tih tur a tih ve a ngai. RT-PCR khawl lei leh hman chungchanga sorkar chet duh dan te, thla sarih zet hri hlauhawin min chen chilh chunga ICU leh ventilator indaih loh thu kan la sawi reng maite hi a mak. 

Ṭhenawm state-a district pakhat Sil­char-a Silchar Medical College-ah chuan September-ah mai khan ICU khum 40 awmna, ventilator nena thuam vek an hawng thei a ni. Kan sorkar hian mipui hriselna leh himna a ngai pawimawh takzet a nih chuan SEDP-a a pawisa dah zozaite hi ICU leh ventilator leina atan hmang phal rawh se.