Lengpui Airport leh mipui rilru

26th February, 2025

16th Finance Commission Chairman chuan press mite zawhna a chhannaah, Indian Air Force (IAF) hnena Lengpui Airport hlan leh inenkawl ṭâwm duh lo an awm chhan a hriatthiam loh thu te, state dangah pawh IAF nena airport inenkawl ṭâwm an awm thute a sawi.

IAF hnena Lengpui Airport enkawltirna tura sorkarin hma a lak veleh eptu party-te'n an duh loh thu an puang a; NGO Coordination Committee-in an remtih loh thu an puang bawk. IAF enkawltir pawiti lo mi tam tak an awm tho bawkin a lang.

Lengpui Airport IAF enkawltir chungchangah hian mipuiin sorkar hmalakna an ngaichâng a, eptu party-te'n an dodal dan an thlir reng bawk. Eptu party ṭhenkhatte'n an sorkar laia airport chungchanga thil an lo tih tawh dan pawh mipuiin an thlir reng a; chuvangin, airport chungchanga an chêt dan hi sorkar hmalakna dodal tumna ngawr ngawr ni lo se a duhawm.

Mizote hi tun hma aṭang tawhin kan ramah thil thar eng emaw a awm dawn hian duh lo leh hlau an awm ṭhin a; hetiang hi thil thar a ni lo. Hmasawnna tur thil eng emaw tih dawna hlauh leh venthâwn neih vanga duh lo te, Mizoramin a chhiat phah tura ngaite an lo awm tawh ṭhin. Ram chhung ril zawk thlenga rél kaltir duh lo tlatte an awm a; khawchhak lungpui lum hlau hial pawh an awm.

Hmasawnna tura hmalakna leh thil thar eng emaw tih dawn hian fimkhur a ngai ngei mai a; chutih rualin, fimkhur lutuk vanga hlauh zel erawh thil ṭha a ni vek lo a, hmachhawn a ngai ve ṭhin.

Tuna ngaihdan puang chhuak tawhte aṭanga thlir chuan, IAF hnena Lengpui Airport hlan duh lo tam tak an awm laiin, airport leh aviation lama a taka tawnhriat nei tawh zinga a tam zawk chuan IAF enkawltir an pawiti lo niin a lang.

Ram leh mipui tana ṭha zawk tura Lengpui Airport kalpui zel dan turah pawh ngaihtuahna thûk zawk sorkar hotute leh mipuiin kan sên a ṭul a; kan hlauhthâwn leh kan duh lohte hi a dik chiah em tihte pawh chîk zawka kan ngaihtuah nawn a ṭha àwm e.