Hlêp tam lutuk tum vanga hna chhia

27th February, 2025

Tunlai hian Lunglei Luangmual leh Vaisam inkar kawng, PMGSY hnuaia siam meka blacktop ṭha lo lutukin sawi a hlawh hle a; sorkar lama thuneitute pawhin an bawhzui niin a lang. Tarlan danin, kawng siam tur hi km. 28-a thui niin, a siamna atan cheng nuai 4,518.74 ruahman a ni a, kawng siamtu chu VRS Construction an ni.

Luangmual-Vaisam kawng siam mekah kut leh ke hmanga tihkhawh theih khawpa chhiaa blacktop a ni hi a thinrimthlak. Vaisam khawtlangin kawng chu a nih dan tur ang taka siam tura contractor an phût te, ṭha zawka siam a nih theih nana hma la tura sorkar an ngente hi a àwm em em. Mizoram Lokayukta-a complaint a lut pawh a àwm hle.

Lokayukta-ah complaint a lut tawh a, dik lo taka thil tih leh a nih tur anga thil tih loh a awm leh awm loh hmuh chhuah a ni theih nan Lokayukta hian bawhzui se; dan loa thil ti leh dik lo taka ti an awm a nih chuan hrem an nih ngei theih nan hma la rawh se.

Tun hma aṭang tawhin Mizoramah hmasawnna hna thawh chhe lutuk a awm fo tawh a; a manganthlak a, a zahthlak bawk. Hna chhia hi ram hmasawnnain a tuar a, Mizoramin hma a sawn tur angin hma a sawn theih loh phah a ni.

Kan ram hmasawnna tur hian sorkarin mawhphurhna lian tak a nei a, mipui pawhin sorkar kan kawh rawn ber fo. Sorkar leh a hnathawkte'n mawhphurhna sang tak a neih rual hian, hna thawktu contractor-te hian mawhphurhna lian tak an nei tih hi contractor-te'n an hriat chian a ngai.

Contractor-te'n mawhphurhna sang tak an nei a, an kutah eng emaw chen chu ram hmasawnna a innghat ve a ni tih hi an pawm tur a ni. Hmasawnna tur hna an thawh hian hlâwkna nei lo turin mipui hian an beisei lo a, hlêp leh hlâwkna an nei ngei turah an ngai. Chutihrualin, hlêp tam lutuk tum avangin hna a chhiat phah tur a ni lo tih rilru hi contractor-te'n an pu tur a ni.