Chak zawkin sawhthing lei ni se

Mizoram sorkar chuan February 20-26, 2025 chhungin sawhthing quintal 14,000 vel a lei tawha sawi a ni a, cheng nuai 700 vel man a ni. Thuneitute chuan society-a inziak lutte sawhthing chu leisak vek an tum thu leh sawhthing lei hun chu kumin June thla thleng a nih dawn thu an sawi ṭhin.

Tunlai hi sawhthing chawh, hralh leh lei hun a ni. Sorkarna chelhtu ZPM party-in sawhthing kg. khat Rs 50-a lei an tiam avangin kum dang zawng aiin Mizoramah sawhthing ching an tam a, thar chhuah pawh a tam niin a lang.

Mizoram sorkarin a intiam anga sawhthing a lei hi a lawmawm a, chutih rualin, eptu party mi leh sa leh mi dang ṭhenkhatte'n thil kal fuh lo lai nia an hriat an sawi hmuh leh hriat tur a awm ve reng bawk.

Kut hnathawktute sawhthing thar hi sorkarin a leisak vek thei tak tak dawn em tih chu Mizoram mipui thlir mek a ni. Mi ṭhenkhat beisei thil kal lo deuh leh sawiseltu an awm ve reng bawk nen, chu chuan mi ṭhenkhatah rinhlelhna leh ngaihṭhat lohna a siam deuh niin a lang.

Sorkar hian tunah chuan sawhthing lei hi ngaih pawimawh bikah a neih rih a ṭul. Sawhthing hralh lehna lam a kal chak lo deuh emaw, harsatna neuh neuh a awm a nih pawhin, sawhthing hralh tur neite chu sorkar hian a leisak vek ngei tur a ni.

Tlang ram lo neih dan kalphung kan hria a, lo hâl a hun ṭêp tawh. Lo hâl a nih chuan kut hnathawktute'n an lo thar lamah hna dang an ngah leh nghal mai dawn. Chuvangin, sorkarin sawhthing a leisak vek dawn a nih pawhin, tun aia chak zawkin lei thei se a duhawm.

Hetih lai hian, khaw ṭhenkhat aṭanga sawhthing lei leh thawn chhuahah sawhthing ṭha lo leh fai tawk lo a awma sawi a ni a, a zialo hle. Hnam dangin Mizote rinawm lo anga min ngaih theihna a ni hial mai thei.

Sawhthing neitute hian anmahni'n an lei duh tur ang bawka ṭha an hralh tur a ni. Tuna kan thil tih dan hian kum dang zela kan dinhmun tur a hril thei a, sawhthing hralh turte chu fai ṭha pangngai takin an sawngbawl tur a ni.