Tui ren tura inrin lâwk a ngai

1st March, 2025

Public Health Engineering department chuan Tlawng tui kám zel tur vênna atan Reiek kàia tui an pump-a bâwrah lungin tui khuahna (temporary barrage) an siam mek.

Sorkar press release-a tarlan danin, Tlawng tui a kum tèla a kàm zel avangin kum 2022 aṭangin ṭhál inṭan tak tak hmain tui tihtlinna atan kum tin temporary barrage siam ṭhin a ni a; chu chuan ṭhál khaw ro tak tak laiin chawlhkar khat vel tla tur tui a khâwl thei ṭhin. Kumina temporary barrage an siam mekah hian metre 350 vela thui tui tling thei tura beisei a ni.

Ṭhál tak tak a lo thlen huna Aizawl mipuiin harsatna lian zawk an tawh lohna tura PHE department an inhmakhua a, a theih ang anga hma an la hi a lawmawm tak zet a, fak an phû.

PHE department-a thawkte'n nasa taka ṭan an la hi a lawmawm a, an lakah lawm nacháng mipuiin kan hriat a ṭha awm e. PHE department mite pawh ṭang sauh sauh se, mipuiin tui an tlâkchham lohna turin theihtawp han chhuah zel teh se.

Mipui pawhin PHE department kan ṭawiawm ṭhat a ngai a, anmahni tiphûr tur zawnga ṭan kan lo lak ve a ṭha. PHE-in ngenna an siam ṭhinte zawm hram hram a ṭul. Khua a ṭhál zual zel ang a, PHE-in Aizawl mipui ṭhat tlanna turin ngenna eng eng emaw an la rawn siam thei a, chungte chu mipuiin kan zawm a pawimawh.

PHE department hian theihtawp chhuah mah se, duhthusamin Aizawl mipui zawng zawngin tui kan hnianghnar hleithei lo. Mipui hian tui kan ren a ngai a, khua a ṭhàl tak tak hunah phei chuan renchem taka kan hman a ṭul ngei dawn. Chumi tur chuan tun aṭangin rilru leh thil tih hmangin inhmakhua thiam ila a ṭha hle ang.

Tlawng lui hi tuia Aizawl khawpui châwmtu a ni a, Aizawl mipui tan a pawimawh tak zet. Lui tui a tlem tial tial chhan hi tuihna siamtu thing leh mau, ramngawte a chereu zel vang niin an sawi. A mawhphurtu chu Mizoram mipui kan ni.

Tuihna tihpun leh Tlawng lui tui tihtam leh hi PHE department tih theih a ni lo a, an mawhphurhna bik pawh a ni lo. Tuihna a tam leh theih nan, Aizawl mipui tlan Tlawng lui tui a tam leh theih nan Mizoram mipuiin mawh kan phur vek. Tuihna titlem zawnga che tawh lo turin rilru siam ila, tuihna a lo pun leh theih nan theihtawp kan chhuah tlan a ṭul e.