In sak ṭanpuina dawng tur thlan

Thingtlanga mirethei in sak ṭanpuina, Pradhan Mantri Awaas Yojana - Gramin (PMAY-G) chungchangah Rural Development (RD) Minister-in tun hnai khan press mite a kâwm.

Minister hian PMAY-G chu tu tan pawh dil theih a ni a, danin dawng thei tura a tihte chauhin an dawn theih a nih thu leh, hnam, chi, sakhuana leh political party vanga inhnâwl theih a nih loh thu a sawi.

In sak ṭanpuina dilna chu NGO-in hnâwl theihna an neih loh thu leh, khawtlang mipui rorelna (gram sabha) thutlukna anga kal a, chu thutlukna chu NGO-in an hriatpui a ngaih thu Minister chuan a sawi bawk.

RD Minister thusawi aṭang hian PMAY-G hnuaia in sak ṭanpuina dilnaah dan ang lo deuha thil tih a awm ṭhin nia ngaih theih a ni a; NGO ṭhenkhatin signature pek duh loh an nei tawh ṭhin anga ngaih theih a ni bawk.

PMAY-G hnuaia in sak ṭanpuina dawng tur hian tehfung eng emaw zat a awm a, dil thei chin leh dil thei lo chin, ṭanpuina dawng thei leh thei lo chiang taka tarlan a ni a; mirethei, khawsak harsa, mahni maia in sa thei lote ṭanpuina tur a ni.

Political party induhsakna leh party dang mite dan beh tlat tumna awm lo se, khawsak dinhmun aṭanga ṭanpuina dawng àwm takte khawi political party-a mi pawh ni se, hnâwl mai loin dan ang taka ṭanpuina pek mai ṭhin ni se. Dawng thei chin ni lote pawh mahni party mi leh sa an nih avanga duhsak bik ni lo se a ṭha hle ang.

PMAY-G hnuaia in sak ṭanpuina dawng tur thlan leh indilpuiah hian rilru dik leh thianghlim tak put a ṭul a, mi dang îtsîkna rilru a awm tur a ni lo.

Khawsak harsa, in sak ṭanpuina dawng àwm takte chu khawi party-a mi pawh ni se, eng pawla mi pawh ni se, khawtlang hruaitute, NGO hruaitute leh khawtlang mipuiin duhsak tlang mai se. Dan anga ṭanpuina dawng thei pawn lama mite chu tu pawh ni se, dan anga hnâwl ngam zel ni rawh se.