Chawlh (holiday)

Tun hnaiah India President hlui APJ Abdul Kalam a boral a, amah sunna atan Mizoram sorkarin chawlh (chawlh) a puang emaw tia sikul/pisa kai lote an awm a, Mizoramah chawlh a nih leh nih loh thu kan inzawt kual nasa hle a ni.

Chawlh kan hman dan leh kan chawlh chhan, chawlh kan lawm dante hi sawi chhunzawm ngai niin a lang a, hnathawh loh kan châk em em dan hi chu a zia lo lam deuh a ni. Tun thil thlengah hi chuan national TV lamah chawlh tih an puan vang te, Meghalaya state-in chawlh a puan vangtein mipui hi an chiai deuh niin a lang a; nimahsela state sorkarin chawlh a puang lo chunga chawlh emaw kan ti lui tlatte thleng hian ngaihtuah a tithui hle.

Mizoram hi state hrang hrang zinga chawlh (holiday) ngah pawl tak niin an sawi a, kan chawlh chhan leh chawlh kan hman dante hi a inang lo thei hle. Mahni hnathawhlai chawlhsana hahdam taka awm hi chu thil nuam tak a ni ngei a; nimahsela hnathawh loh kan nghakhlel lutuk leh awm âwl kan thlahlel lutuk anga lang hi chu kan inennawn a ṭha hle.

Sorkar lam pawh an thiam chuang lo a, state puma chawlhna tur âwm deuhte chu a awm ngei a; nimahsela hmeichhe pual bik, chutah pawh hmeichhe kum upa lamte chiah an telna pawl ni bika state pum chawlh a puangte hi thil inhmeh lo tak a ni. Kan chawlhna ṭhenkhatte pawh hi ennawn theih ni se a ṭha a, hei bakah hian bandh leh thil dang avanga hnathawh remchan loh ni hi a awm belh deuh ziah bawk.

Kar khatah ni hnih chhung pisa leh sikul chawlh kan nei a, pisa kai hun chhungin mi tam takin ṭul insiam chawpin hnathawhna an chhuahsan bawk a, hemi piah lama chawlh kan thlahlel lutuk hian kan work culture ṭhat lohzia a pholang a; a bikin sorkar hnathawkte hian an hna hi tun aiin ngai pawimawh deuh se kan ram kalphung pawh a ziaawm deuh mahna.