Sikul ṭan hun

Tun hnaia Council of Minister ṭhukhawm chuan, sikul kai hun chungchanga ruahmanna thar an pawm. Study Group-in rawtna an siam dan chu - thlasik (winter)-ah October 15 aṭanga a kum leh February 15 inkara sikul ṭan hun chu zing dar 8:30 a ni a; nipui (summer) February 16 aṭanga October 14 chhunga sikul ṭan hun tur chu zing dar 8 a ni.

Mizoramah sikul kai hun siam danglam a ni a, mi ṭhenkhatin a ṭha an tihlaiin mi
ṭhenkhat chuan a hma lutuk tiin an sawisel ve thung. Sikul ṭan hun hi ngaihdan a inper san hle mai a, chhungkaw ṭhenkhat tan chuan hma taka sikul ṭan hian kawng tam takah a chhawk a, an thawh hma phahin hna an ṭan hma phah a, a hlawkzia sawi tur an nei.

Hetihlai hian chhungkaw tam tak chuan sikul ṭan hma hi an buai phah a, an thawh tlai vangte pawh a ni bawk a, zing karah an inpeih fel hman lo. Hemi piah lamah hian lirtheia sikul kal tur a hun sawn hma avanga harsatna tawkte pawh an awm bawk a, sikul ṭan hma hian chhungkaw tam tak tan harsatna lian tak a thlen a ni.

Tunah chuan sorkarin rawtna thar a pawm ta a, nipui leh thlasikah sikul ṭan hun hrang hman a ni dawn. Hei hi hman a nih hma chuan a ṭhat leh chhiat hriat theih a la ni lo a, chutih rual chuan sikul ṭan hun avanga inhnialna awm reng ṭhelhtu atan a ṭha dawn hle a ni.

Engpawhnise India ram hmun dang, keini aia ni chhuah tlaina state-ah mah zing dar 7:30-ahte sikul an
ṭan thei a nih chuan; keini aia thlanga awm Bangladesh aia standard time tlai zawk hmang kan nih hre rengin hnathawhna hun hi siam rem thiam a pawimawh.

Thil thlak thleng reng reng hian a ṭha zawng leh chhe zawngin nghawng a nei ṭhin a, sikul
ṭan hun sawn pawh hian a tawn tawnin nghawng a nei ngei a; nimahsela state dang tam zawk pawhin an tih theih tih ve tum a, zingkar hunte ṭangkai zawka hmang chungin sikul ṭan hun mila mahni chhungkaw lam insiamrem i tum zel ang u.