Haw haw nun

Lungleia mipui lungawi lo Court tuala pungkhawm chuan, Court building an vawm bakah Lunglei Chief Judicial Magistrate chenna in an suasam.

Tun hnaia Lungleia thil thleng hi Mizoramah thil thar a ni lo a, a vanduaithlak hle a ni. Misual hmel hmuh duh avanga punkhawm hi kan intihhmuh ta zel mai a, khaw dangah pawh hei vang hian buaina a lo chhuak fo tawh.

Tun ṭuma Lung-leia buaina chhuak hi chu a dan a dang deuh a, roreltu lam an beih tel avangin a nghawng a na hle dawn niin a lang. Court building vawm mai duhtawk lo a, Chief Judicial Magistrate chenna quarters luhchilha suasamtute hi chuan an tisual let der a, he thil hi a tawpna ni thei se a duhawm ngawt mai.

Hetiang nikhua hian khaw-tlang hruaitu tan pawh banphar a harsa tawh a, mipui haw hawin thil an nawr tawh chuan inkhap theih loh tluk a ni. Chuti chung chuan khap theih loh tak tak hi a awm lo a, hruaitu huaisen bik leh remhre deuhte chuan mipui vanga buaina chhuak thei an lo khap dai thiam tawh ṭhin.

Mizoramah hian haw hawa thil nawr hi kan bansan hleithei lo a, tun hnaiah pawh Police-te tâwnga misual hmel hmuh tuma punkhawm hi kan la intihhmuh zel chu a nih hi!

Tin, chhan hrang hrang avanga Lunglei lama Police hotute an awm lo rual ṭhup mai hi thil fuh lo tak mai a ni. Harsatna thleng tur hi hriat lawk ni lo mah se, Lunglei district-a police hotu liante an awm lohlai a ni deuh vek a, a ṭhenin chawlh an la a, a ṭhen an training a, a ṭhen duty-in hmun dangah an zin chhuak a; tun hnuah chuan district khata dan leh thupek kengkawhtu lama hotu liante a ruala an awm loh ṭhup tawh lohna tura ruahmanna siam pawh a ṭha awm e.

Misual hremtu tur chu court a ni a, chu chu ring tawk lo pawh ni ila a bak a awm chuang lo. Roreltute thlenga dim loa chenna in suamsam hi thleng nawn tawh lo se, Mizote hian haw haw nun hi i kalsan tawh teh ang u khai.