Covid-19 nge kan hlauh police duty?

October 26 aṭanga 'Covid-19 No Tolerance Fortnight' kalpui a ni dawn a, he mi chhung hian Covid-19 dona atana sorkar ruahmanna siam hrang hrang - Unlock Guidelines, Standard Operating Procedure (mipuite zawm tur) hrang hrang leh The Mizoram (Containment and Prevention of COVID-19) Ordinance, 2020-te khauh tak leh ngaihhnathiamna tel loa kalpui a ni dawn. 

Hei bakah hian Traffic Police pawhin Mizoram chhungah No Tolerance Fort­night khauh takin an kalpui dawn a, lirthei document dik lo leh driving licence nei loa lirthei khalhtute an man dawn bakah, traffic rules bawhchhiate ngaihhnathiamna tel loin an man ang. 

Mizoramah Covid-19 hri vei an tlem tawh viau hnuah tun hnaiah an pung leh ta a, hri vei hmuh chhuah zingah kaina hriat loh an awm nual bakah veng leh khaw hrang hrangah a darh nasa a, natna lang chhuak (symptom nei) an awm ta deuh zel bawk. He hri hi tuna theih tawpa kan do let loh chuan kan ramin na zawkin a tuar palh thei a, tun hi ṭan rual hun a ni. 

Hetihlai hian mi tam tak chuan Covid-19 hri aiin police duty lam hi kan hlau zawk emaw tih mai turin kan khawsa ṭhin a, a pawi takzet a ni. Police duty an awm lohna hmuna hmai tuamna (mask) phelh zui mai, police hmuh phak loha thil tih khawm ṭhulh chuang lote leh a huhoa awm pawh pawisa mang lo kan awm ta nual mai hi thil pawi tak a ni. 

Mithiamte chuan tun hnaia India rama hri kai darhna hmun langsar tak pakhat chu tlem thama inhmuh khawmna (small gatherings) hrang hrang a nih thu an sawi a, chhungkaw chaw ei khaw, birthday lawm, inneihna, pass lawm leh hetiang lam hawia hmelhriat hnai inhmuh khawmnaah an innel avangin mi an fimkhur nêp a, hri a darh phah nasa niin an sawi. 

Kan in-lockdown chhan, kan inkhung hran chhan, sum tam tak hloh huama hna ṭhulha kan inkhung chhan kha Covid-19 hlauhawm vang a ni; police an duty avanga fimkhur thar ni loin, Covid-19 hri darh zel hlauhna avang zawkin i fimkhur ang u.