Gas tichinpentute hremna

Chief minister Lal Thanhawla leh Food, Civil Supplies & Consumer Affairs minister John Rotluangliana-te hoin sorkar hotute leh Central YMA hruaitute chuan tun hnai khan eirawngbawlna gas harsatna leh gas tichingpen ṭhinte laka na zawka hmalak dan tur an sawiho a; gas tichingpentute na zawka hrem tura hmalak an rêl.

Eirawngbawlna gas tihchingpen hi state dangah chuan a awm ve meuh lo a, Mizoram chhungah hian zalen takin hun rei tak chhung chu an lo khawih chingpen tawh a ni. Mizote hi thil thlir liam mai ching kan ni ta emaw tih mai turin gas tihchingpen hi hre reng chungin kan ngaimawh lem lo niin a lang a, gas buk tling anga kan lei chu nasa taka tihchingpen a ni. Central YMA lam an pen chhuak ta a, gas tihchingpenna hmunte luhchilhin thil tisualtute hi an man ta a ni.

Hetiang a nih tawh hnu hian chief minister hoin eirawngbawlna gas tichingpentute na zawka hrem dan an la rel laih laih chauh a, kan sorkar hi a che rang tawk lo a ni. Hetiang thilah hi chuan chief minsister inrawlh hun nghah kher ngai loin, a changtu minister mai pawh ko buai loin dan leh thupek kengkawhtute'n an tih tur ti mai ṭhin se, innghah leh inrawn buai ṭul lohna thil niin a lang.

Eirawngbawlna gas khawih chingpentute hi hnam pawi khawihtute an ni a, sorkar hotute'n an hrem dan tur an rel nghak lo hian na zawka hrem dan hi thuneitu lam hian lo ngaihtuah ve mai ṭhin se a ṭha hle. Dan fel tak a awm sa vek a, tuin emaw a rel avanga hremnate hi na sawt thei niin a lang si lo a, dan leh thupek kengkawhtu lam hian hetiang thilah hi chuan ṭan la deuh ṭhin se a ṭha.

Tunah zet chuan kan ram hotupa ber hoin eirawngbawlna gas tihchingpen thu ngaihtuah a ni ta a, he thil sual pawh hi a tawp zui turah ngai ang. Chief minister meuh a inrawlh tawh hnua eirawngbawlna gas tihchingpen hi a la thleng fo a nih chuan, tu dang mualphona ni loin chief minister, a changtu minister leh a sorkar pumpui mualphona a ni ngei tawh ang.