Lunglei thil thlengah i inzir ang u

September 22, 2016-a Lunglei District Court beih a nih vang leh Chief Judicial Magis-trate quarters suasam a nih chungchangah, Gauhati High Court chief justice Ajit Singh chuan chief minister Lal Thanhawla lehkha a thawn a, thil thleng chu pawmzam theih a nih loh thu a ziak a, a titute an phû tâwka hrem an nih theih nan rang taka bawhzui turin a phut nghal.

Lungleia thil thleng ang deuh hi Mizoram khaw dangah pawh thleng zeuh zeuh tawh mah se, court building khawih leh magistrate in luhchilha suasam hi chu thil thleng ngai lo a ni. He thil thleng hian a nghawng na dawn hle tih a hriat theih a, mizoram hmun danga a thlen nawn tawh lohna turin inzirna atan i hmang ang u.

Mizo zingah mahni kuta dan lek kawh ve ngawt mai ching an awm a, hetiang titu zingah hian khawtlang hruaitu ṭhenkhatte pawh an tel. Dan hnuaia awm ṭheuh kan ni a, kan dan neihin misual nia kan puhte a hrem dan hi kan duh khawp lo a nih pawhin hei bak hi dan hman tur a awm chuang lo a, mahni hi dan lek kawhtu ber emaw intia tharum thawh leh haw haw zawnga chet hi i sim tawh ang u.

Lungleia thil thlengah pawh hian mipui pungkhawmte hi an sual vang reng emaw lam aiin dan an hriat loh vang a ni thui hle ang a, court building tihchhiat leh magistrate in luh chilha suasamte phei hi chu thil pawi tak a ni. He thilin a nghawng thui dan tur hi ngaihtuah thiam se an tikher lo tur a ni a, dan hriat loh avangin an tuar zui dawn niin a lang.

Lungleia thil thleng hi Mizorama a tawpna ni tawh se, 'A hmel kan hmu duh' tia inhawr khawm hi sim tawh ila, Police Station leh court building bula punkhawm hian awmzia a nei lo tih hre chiang bawk ila a
ṭha. Sorkar thuneitu lam pawhin a hun loah ngawih chuh tawh lo se, Police pawhin Police an nih angin an hna huaisen takin thawk ṭhin se a ṭha hle. Lungleia mipui pungkhawmin an tisual tawh a, Mizoramin inzirna atan hmangin i tisual nawn tawh lo ang u.