MPSC rawtna hnâwl

Chief minister Lal Thanhawla chuan, Mizoram Public Service Commission (MPSC)-in Mizoram sorkara staff nurse hna thawk tura mi 25 a lak (rawt)-te chu Mizoram sorkarin a hnâwl thu a puang. Staff nurse tur mi 25 lakna atana interview-naah MPSC member pathum zinga pakhat chauh a
ṭhu ve niin a sawi a, "Member pakhat chauh a awm avang leh sawiselna a tam avangin kan hotute'n, September 21, 2016-a Cabinet meeting chuan pawm lo ang, an ti a. MPSC recommendation hi hnâwl a ni," a ti.

Public Service Commi-ssion hi sorkar aiawha hnathawktu latu tura din an ni a; 1987-a Mizoram state-a hlankai a nih hnu khan hemi kawngah hian hmalak nghal a ni a, Mizoram sorkar notification No A 11020/1/87 - P&AR(GSW) dated 30.4.1991 angin MPSC Chairman hmasa ber ruat a ni.

MPSC hi hun rei tak chhung a kal ta a, a chang chuan chairman ruat danah leh member ruat danah sawisel a kai chang a awm. Sorkar aṭanga tla hrang tur a ni a, chutihlaiin sorkar hruaitu lute nena mi inhnai tak an ruat chang a awm a, ruat âwm tak nia lang lem lo ruatte pawh an lo awm tawh.

Heti chung hian MPSC-in hna a lak tawh hi chu dik tura ngaihna a lian hle a, an mihring lakte an dik leh dik loh lam chhui vek theih ni lo mah se, mipui nawlpui hi chuan MPSC kut a nih tawh hi chuan dik thawkhat tura ngaihna a lian hle.

Tuna MPSC-in staff nurse tur a lak danah hian Mizo Zirlai pawl (MZP) chuan thil dik lo, chhungte induhsakna a awm nia ngai-in, MPSC chu dik taka la ṭha leh tura an phût bakah, Mizoram sorkar pawh MPSC recommendation pawm lo turin a ngen. Hei hi sorkar chuan thu tlingah a ngai a ni ngei ang a, MPSC rawtna hi a hnawl ta a ni.

A hnawl chhan chief minister ṭawng-kama a lan dan chuan sawiselna a tam vang leh member pakhat chiah awmlaia lak a nih vang a ni. Sorkar meuhin a hnawl a nih chuan a chhan fel tak a nei tur a ni a, tuna a chhan an sawi takte hi a chhan tlingah an ngai a nih hmel a, engpawhnise hnawl leh ngai tura hna lak a ni hi a pawi khawp mai.

Eng angin nge MPSC hian tehna a zam a, eng vanga lak ṭhat leh ngai nge a nih tih lam hi kimchanga hriat ni ve chiah lo mah se, sawisel theih tura thil a kal hrim hrim hi a fuh lo. MPSC hi chu dik taka kal tura ngaih a ni a, tuna thil thleng hi thil thleng zen zen lo a ni a, hna lak tura rawtna siam tawh tihṭhat ngai a awm tawh lohna turin fimkhur takin kalpui ṭhin se a ṭha ang.