State university din tur hi

Lunglei leh Champhaia tlawmngai pawl intêl khawmte chuan Mizoram State University din tur chu an khuaah dah turin Mizoram sorkar an ngen ve ve a; an ngenna chu February 28, 2025 khan Higher & Technical Education department hotute'n khawpui pahnih huam chhunga MLA-te nen an ngaihtuah.

Mizoram chhim lam leh khawchhak lama district headquarters pahnihte hian an khuaah state university dah a âwm hleah ngai ve vein sorkarah an dil niin a lang a; an duhna leh dilna hi thil âwm tak a ni.

NEP 2020 duh dan angin multidisciplinary-a kal a ngaih avangin Mizoram sorkar chuan state university din tur chu hmunhma hranpa neia din loin, college eng emaw zat sâwi khâwmin, hmunhma leh hmanrua neih sate inhman ṭâwm turin din a tum nia sawi a ni.

Sorkarin state university din a tum dan thlirin, Aizawl ni lo khaw dangah chuan state university dah a remchang dawn lo niin a lang. Aizawl ni lo khawpui dangah sorkar college pahnih aia tam a awm lo niin an sawi. District headquarters dangah din ni ta se, NEP 2020-in state university nihphung tur a sawite hi tihpuitlin theih a ni ang em tih ngaihtuah tel a ngaiin àwm e.

Tun hma aṭanga tun thlengin Mizoram hi state hausa a ni ngai lo a, tunah pawh sorkarin sum harsatna a tawh nasatzia sawi a ni ṭhin. State rethei Mizoram tan state university din hi thil huphurhawm tak a nih a rinawm.

NEP 2020 avangin state university din ngei a ngai si a, state university din a nih theih nan leh chuta sum sen tam lutuk tur tihziaawm nan bakah, NEP-in kalphung a siam thlirin Mizoram sorkar chuan state university din a tum ta a nih hmel a; state university din tura sorkar tum dan leh ruahmannate hi hriatthiampui a ngai dawn a ni.

State university din turah hian Mizoram sorkar hian uluk takin ngaihtuahna hmang se, Mizoram tana ṭha ber turah chuan tute'n emaw an hamṭhatna tura an nawrna karah pawh huaisen takin thutlukna siam se.

Mizoram State University Bill, 2025 chu vawiin hian Assembly-ah pharh a ni dawn niin a lang. Bill pharh a niha sawiho hunah pawh party hamṭhatna tur emaw, party dang beihna atan hman ni lo se; kan state mil tâwk leh kan ram tana ṭha ber tur thlir chunga kalpui ni rawh se.