Health department MR bill
Sorkar kum liam ta, 2014-15 chhung khan Health department hnuaia Health & Family Welfare leh Hospital & Medical Education department-te'n medical reimbursement (MR) bill-ah nuai 900 chuang an hmang.
Health department hnuaia thawktute MR bill tam chhan hi ngun taka zir chian a ṭha hle mai. Kum 2014-15 chhunga Health & Family Welfare hnuaia Mizoram hmun hrang hrang 20-a thawktute MR bill zawng zawng belhkhawm chu Rs. 5,62,81,524 niin, directorate bika thawktute bik MR bill chu Rs. 11,597,311 a ni a, belhkhawmin Rs. 6,78,78,835 a ni. Hospital & Medical Education department-a MR bill an pek zat chhût chhuah chu Rs. 2,35,62,771 a ni a, directorate bikah mi 49-in Rs. 43,48,957 an hmang. Health department pahniha thawkte'n kum 2014-15 chhunga MR bill atana an sen zawng zawng chu Rs. 9,14,41,606 a tling.
Health department hi hnathawktu an awm ṭhathnemna a ni a, an MR bill pawh hi tam deuh tura ngaih a ni a; nimahsela directorate bika mi 49-in Rs. 43,48,957 an bill-te hi chu chhui chian a ṭhat a rinawm. Health department hi MR bill buaipuitu an ni a, anni tan hi chuan MR bill siam zung zung hi thil harsa a ni lo, hei hi remchangah lain ṭul vak loah pawh MR bill an siam ṭhin a nih chuan a pawi hle ang. Sorkar hnathawk an ni a, MR bill lam khawihtu an nih vanga an lo induhsak a nih phei chuan induhsakna ṭha lo tak a ni ngei ang.
Engpawhnise mihring hrisel lohna thil a nih chuan indem vak theih a ni lo a, a kalphung hi a dik a nih chuan thik chi pawh an ni lo ang. Ngaihtuah ngun ngai ta erawh chu hnathawktu zat aṭanga tehin eng department hian nge MR bill tam bik ṭhin a, kum tina an bill ṭhin dante pawh hi zir chian a ṭha ang.
Mizoram sorkarin sum lamah harsatna a tawk mek a, MR bill zir chiangtu tur committee-te pawh an din mek a ni a, anni lam hian MR bill tam bik ṭhin department-te pawh hi an zir chian a ṭha. Mihring tam vanga bill sang a awm thei a, MR bill awlsam vanga bill sangte a lo awm tel a nih chuan chinfel thuai a ngai ang. Engpawhnise MR bill-a Mizoram pawisa a kal ral hnemzia ngaihtuah hian, khawilaiah emaw hi chuan kan inhrêk deuh a ngai tih a lang a, MR bill kan kalpui zel dan tur hi ngaihtuah ngun a ngai hle a ni.