Aikal lak titawp turin ṭang zel se

Chief Minister chuan Assembly session neih mekah March 3, 2025 khan sorkar hnathawk aikal lak phal a nih tawh loh thu a sawi a; aikal la hria chu sorkarah hriattir turin a ngen.

CM hian BJP MLA Dr K Beichhua zawhna kal zelah, sorkar hnathawk aikal late tan insiamremna hun eng emaw chen hawn a nih thu leh tunah chuan aikal lak phal a nih tawh loh thu te, aikal la an la awm chuan aikal latu leh aikal latu awmnaa mawhphurtu officer chungah action lak a nih tur thu te, hremna an nih pawhin an phunnawi theih loh tur thu te, dam lohna thilah pawh aikal lak theih a nih tawh loh thu te a sawi a; aikal lak phal loh hian CSS hnuaia thawkte pawh a huam thu a sawi bawk.

Tuna sorkar ding lai hian sorkar an din tirh lam aṭangin sorkar hnathawk tan aikal lak tihtawp tumin hma an la nghal a, hriattirnate pawh chhuahin, hun tiam an siam a ni. Sorkar hian aikal lak tihtawp tumin theihtawpin hma a la niin a lang.

Aikal titawp turin sorkarin mawhphurhna sang tak a nei a, tih tak takna a neih a ṭul. Chutih rualin, sorkar hnathawkte leh department leh office tina hotute mawhphurhna a sang hle. Sorkar duh dan hi sorkar hnathawkte leh department/office hotute'n an ngaih pawimawh a ṭul a, sorkar thu an zawm a ngai.

Thil reng rengah thuneitute'n theihtawp chhuahin uluk takin vil mah se, thil ti ru duh tan chuan tih theih dan kawng a awm zel a; thil ti rûk tum na nâ nâ hi chu inven se a harsa hle ṭhin.

Chutiang chiah chuan sorkar hnathawk aikal la chungchangah pawh sorkarin titawp turin theihtawp chhuah mah se, sorkar thu awih duh tlat lo, aikal lo la la ru duh an awm tlat chuan sorkar thuneitute tan hriat vek a harsa ang. Chuvangin, CM-in a sawi leh ngen angin, tun thlenga aikal la hriate chuan thuneitute hriattir hreh lo ila a tha ang.

Sorkar hnathawk aikal lak hi danin a phal loh a ni a, titawp turin ṭan tlan a ngai a; sorkarin theihtawp a chhuah ang a, sorkar hnathawkte leh mipui pawhin sorkar ṭan lakna chu kan ṭawiawm ang a, ṭan kan lakpui a ngai a ni.

Chief Minister-in March 4 vek khan e-office kalpui mek a nih thu sawiin, chumi avang chuan thawktu mamawh zat a tlem tual tual dawn thu te, chu chuan sorkar hnathawk indaih lohna pawh a ziaawm beisei a nih thute a sawi. Hei hi thil ṭha, hmasawnna sang zelin a rawn thlen a ni a; e-office hi hmang ṭangkai lehzual turin sorkar hian ṭan han la sauh sauh teh se.