Mizoram 2025-26 budget

Kum 2025-26 chhunga Mizoram sorkar sum hman tur ruahmanna, budget estimate chu March 4, 2025 khan Finance enkawltu Chief Minister-in a pharh a; budget thar hi cheng vbc. 15,198.76 niin, kum 2024-25 aiin vbc. 786.64-in a tam zawk.

Chief Minister-in budget pharh paha thu a sawiah thil chi hrang hrang a sawi a; a sawi aṭang leh a lan dan maiah chuan thil lawmawm lam a ni tlangpuin a lang.

Budget pumpui belhkhawm kum hmasa aia a tam zawk hret ṭhin hi chu thil nih dan tlangpui, ni tura ngaih sa a ni a; a pawimawh zawk chu - sorkar leh ram mipui nâwlpui tan hmasawn phahna tur a awm em, sorkar sum dinhmun ṭha lo reng mai siamṭhatna tur lam hawi ruahmanna a awm em, tihte hi a ni ang.

Budget tharah hian hmasawnna hna thawhna tur (capital expenditure) erawh cheng vbc. 200 chuanga a pun bakah, budget pum pui aṭanga percentage pawh a sang hret a; a lawmawm hle. Sorkar hnathawk hlawh, pension hlawh, sorkar inrêlbàwlna, leiba rulhna, etc. (revenue expenditure) atana ruahman chu kum hmasa aiin sum zatah sang hret mah se, percentage a hniam zawk hret a, a lawmawm lam a ni.

Mizoramin kawng hrang hranga sum a hmuh tura beisei zat pawh kum hmasa 2024-25 aiin a tam zawk tlangpui a, a lawmawm. Chutih rualin, state-te'n sorkar laipui aṭanga sum an hmuhna lian tak pakhat Post Devolution Revenue Deficit Grant aṭanga hmuh beisei chu Finance Commission duh dan angin nasa takin a tlahniam.

Hmun dang aṭanga sum hmuh a pun beiseiawm mah se, PDRDG aṭanga sum hmuh nasa taka tlahniam avang hian harsatna eng eng emaw thleng thei a nih a rinawm a; sorkarin remchem tak leh hmanna tur uluk taka ruahman chungin sum a hman zel a ngai ang.

State-in chhiah aṭanga sum a hmuh, State Own Tax Revenue chu kum hmasaah vbc. 1,312.42 a nih laiin, BE tharah chuan vbc. 1,478.26 a ni a, a punna hi vbc 165.84 niin, 12.5% vel a tling. Chhiah aṭanga sum hmuh tihpun theih a nih chuan a ṭha em em a; chutih rualin, state-in chhiah aṭanga sum hmuh a tihpun dan turah mipui náwlpui, a bik takin khawsak harsa zawkte tawrhna thleng lo tura tihpun ni thei se a duhawm.