ACB-in chhui chhuak rawh se

Chief minister Lal Thanhawla chuan NLUP hnuaia sangha chi supply dan Anti Corruption Bureau (ACB) chhui chiantir turin Vigilance department a hriattir.

Mizoramah hian tun hma aṭangin sangha chi leh thlai chi supply-ah hian sawi neuh neuh a awm ṭhin a, Mizo mipui nawlpui hian thil kan chik tawk loh vangin ṭhenkhatin sum siamna ang maiah an hmang ṭhin niin a lang a, a vanduaithlak hle. Tunah mi ṭhahnem­ngai leh thil chhui chiang peihte'n NLUP hnuaia sangha chi sem danah thil fel lo awm ngeiin an hria a, chief minister beng thlengin ACB chhuitir a ni dawn a, thil ṭha tak a ni.

Chief minister hian ACB kuta thil chhuitir tura a tih hi chiang taka chhui ngei ni se, thil awm dan dik tak hi mipui hnenah puanzar leh ni thei se a ṭha khawp mai. ACB thil chhui tur hi an chhui hmaa thil awm dan hre chiangtute hian a ṭul angin pui thei se a duhawm a, a chhan chu Mizoramah hian thil chhui ve ting tang si, chhui chhuah awm tak tak si lote hi a awm ṭhin avangin tun ṭum chu thil awm dan chiang zawka chhui chian a ṭha khawp mai.

Thil huatthla la tak ṭhin chu sorkarin thil tih tak tak tuma a beih pawhin khawilaiah emaw mi rinawm lo, sum siam ringawt ngaihtuah an lo inphûm ṭhin hi a ni. NLUP-te pawh hi ngaihdan a phir nasa a, a kalphung hrim hrim duh lo an awm. Kan duh emaw duh lo emaw an kalpui tawh a nih chuan a duangtu lamin an duan anga kuthnathawktute hlawkna tur hawi zawnga kalpui theih ni se a ṭhat tehlul nen, NLUP-ah pawh kuthnathawktu aia hlawk tum mi rinawm lo an inrawlh zel a, a pawi hle a ni.

NLUP hnuaia sangha chi supply dan hi sorkar hian a hre chiang lo a ni mai thei a, mimal aṭanga thil fel lo awma hriat a nih hnuah chief minister beng a thleng chauh a ni. Engpawhnise chief minister meuhin ACB kuta dah a rawt a, ACB-te hian thil fel lo a awm nge awm lo hi chhui chhuak se, mipui hian thudik hriat an duh a ni.