Zo nun ze mawi – Hawihhàwmna

Mizote kût ropui ber Chapchàr Kût chu vawiin hian Mizoram hmun hrang hrangah hman a ni dawn. Kût hi Aizawlah chuan nimin khan Lammualah hman ṭan a ni a, tun kár tìr aṭang khan Kût pualin exhibition chi hrang hrang kalpui a lo ni tawh bawk.

Chapchar Kûtah hian hun eng emaw ti kal ta aṭang khan thupui neih a lo ni tawh a, kum 2017 aṭang phei chuan kum tin thupui neih a ni ṭhin.

Kum 2017 aṭanga kumin thlengin thupui pakua a awm tawh a, chu'ng zinga pangaah chuan thupuiah 'Zo nun ze mawi' tih a tel. Kan thupui hman ṭhinte en hian, Mizo nuna ze mawi leh ṭhate Mizo mipuiin kan hriat thar a, kan lan chhuahtir leh a ṭul ta hle tihna a ni thei ang.

Chapchar Kût thupuite hi ṭha tak tak vek a ni. Kût thupuite hian eng ang takin nge Mizo mipui rilruah thu a sawi a, nghawng a neih a, Mizo mipuiin an hlâwkpui dan hriat theih a ni lo. Chuti chu ni mah se, mi eng emaw zat chuan an hlâwkpui turah ngaih theih a ni âwm e.

Kumina Chapchar Kût thupui chu 'Zo nun ze mawi–Hawihhàwmna' tih a ni. Thupui hi tunlaia Mizo mipui nunphungah leh hun kal zel turah a pawimawh hle mai a, mi tinin kan mamawh a ni.

Mihring hi mi dangte nena chengho tura Siamtute'n a siamte kan ni a, mi dang tel lo chuan nun khawchhuah theih a ni lo. Mi dangte nena kan nunhonaah hian hawihhàwmna kan neih a ngai em em. Kan lakah hawihháwm turin mi kan beisei ṭhin a, keini pawh mi dangte lakah kan hawihhàwm a ngai ve bawk.

Hawihhàwmna tel lo chuan nunho a nuam lo a, hawihhàwihna nen chuan mi dangte nena thil tihho leh chenho a nuam ṭhin. Kumina Chapchar Kût thupui 'Zo nun ze mawi–Hawihhàwmna' tih hi mahni ṭheuhah la lut ila, nunpui ila, mi dangteah tunah leh nakin zelah pawh i lan chhuahtir ṭhin ang u.

Chapchar Kût hmangtu zawng zawngte'n hlim takin hmang se; hawihháwm lo taka chea rûi buai te, mi tana harsatna siam zawnga che leh mi dang tibuaite chu thuneitute'n dîm lo se a ṭha hle ang.