Hnu chhui leh hremna

Mizoram DGP Dharmendra Kumar chuan, "Mizoram police-te hna an thawk ṭha tâwk a, thil chhui hna pawh an thawh chak hle. Mahse, prosecution hna lam a chak tawk lo a ni," tih Crime Review Meeting neihah a sawi chhuak.

Mizoram Police-te hi kan duhkhawp lohna tam ṭhin mah se, state danga police-te nena khaikhin chuan an la chhe lo hle a ni. Kan intehpuite an ṭhat loh avanga ṭha awma awm ringawt erawh a fel ber chuang lo a, mahni leh mahni inel chunga tun hma aia ṭhaa beih zel a ngai a, mipuiin tun hmaa Mizoram Police ang kha an ngai ṭhin a ni.

DGP thusawi chhuah, hnu chhui kawnga Mizoram Police-te an fakawm thu hi chu kan pawm tlang viauin a rinawm. Mipui an pung zel a, sualna a pung a, sualna mak tak takte pawh a thleng a, heti chung hian kan Police-te hian hna hi an thawk ṭha thawkhat hle a ni. Nimahsela chhui chhuah hnua an kalpui zel dan a chak tawk loh thu a sawi hi ngaihtuah zui a ngai hle.

Mizoramah hian executive leh judiciary a hrangin a kal tawh a, hei hi a ṭhatna a awm rualin a ṭhat lohna pawh a awm ve thei bawk. Police hnu chhui chhuah tawh, a hremna pek leh an case kal thuipui zel danah harsatna an tawk a nih chuan, an harsatna tawh chhan hi hriat chian deuh a ṭha hle a ni.

Police lam pawh­in an hnu chhui kal zel hi an hriat chian a, an bawhzui thiam a pawimawh tel bawk a; misual chhui chhuah vek tawh hnu, hremna pek hleihtheih loh leh an chungthu rel fel lawk loa awm ṭhin hi sorkar hian a ngaimawh tur a ni a, en liam mai chi a ni hauh lo ang.