Ramri chingfel tura hmalak ngam a hun ta

Cachar District Forest Officer (DFO) hoin tun hnai khan Assam Forest department mite leh police eng emaw zat chu Saihapui-V khuaah kalin, khaw dáia Mizo IR sipai duty-te chu an awmna hmun chhuahsan turin an hriattir a, Saihapui-V mipuite chu an leilet/ huanah kal an phal lo. Mizo IR sipai duty-te chuan an awmna hmun chu chhuahsan an tum lo. 

Tun hnaia Assam leh Mizoram ramri buaina hi Assam state inthlang turin a nghawng anga sawi theih ni bawk mah se, ṭhenawm state-in an zuam em em leh an duh hun huna ramri thila an tihbuai theih state nih hi chu thil fel lo tak a ni. Kan state sorkar chuan ramri pawm chin a nei chiang tawh a, council of minister ṭhukhawm meuhin ramri pawm chin a neih ngam tawh chuan, chu ramri humhim tur chuan ke pen ngam a hun ta. 

Tuna kan ram hruaitute'n ramri an chhaih dan hi chu lemchanna ang lek lek pawhin a duh tan chuan a sawi theih a, Assam-in min rawn nawrna hmun zelah na taka nawr lêt anga lan tumin sipai kan indaih belh zel a, chutihlai chuan kan ramri nia kan sawi humhalh tur erawh chuan ke kan pen miah lo niin a ngaih theih. 

Ministry of Home Affairs lamin ramri chungchanga zawhna a zawhte pawh kan chhang lo a, MHA lam aiawh a lo kal chuan kan dawih âw leh viau lawi si a; Assam lamin kan bungraw phur lirthei an dan lohna tur tawk vela ramri humhalh anga lan ringawt hi chu a fel lo hle a ni.

Tunah hi chuan Assam nena buaina neih lohah kan lungawi tawk a, a ziaka fel lo chinfel tuma hmalakna tak tak kan nei lo a, kan hotupa berin ramri chinfel dan thuruk a hriat lah a la sawi chhuak loin a la bawhzui bawk si lo. Ramri thilah hian inkhualtelem angin mipui laka mawi tur chinah hian kan thên kual vel mai mai ang tih hi thil hlauhawm tak a ni. 

Kan sorkar hian ramri chinfel hi a duh tak tak a nih chuan hun rei lo te daih tur sipai duty post siam mai maiah lungawi lo se, a ṭul angin sorkar laipui leh Assam sorkar pawh be ngam se, tun hi ramri chinfel duh tak taktu tan chet chhuah hun dik tak a nih hmel.