Thutlukna huaisen takin siam se

Dan hnuaiah beer leh wine zawrh a nih theih nan Mizoram sorkarin hma a lak thu Chief Minister-in Assembly session neih mekah a sawi.

Chief Minister hian tuna budget session kal mek tìr lamah khan, "Uain leh beer erawh hi chu regulate kan tum a ni. Chumi atan chuan tlémin kan Minister (Excise Minister) hian a Act-a kha han amend deuh hlek a tum a ni àwm e, tun session-ah hian," a ti.

Hetih lai hian MNF Gen. Hqrs office bearer-te March 5, 2025-a Mizo Hnam Rûna ṭhukhawm chuan resolution an siam a; zu khapna dan The Mizoram Liquor (Prohibition) Act, 2019 tidanglam a, wine leh beer thlah zalen a ni tur chu pawi an tih thu leh, ualau taka lei theih tura siam chu ṭha an tih loh thu an puang.

Zu leh a kaihnnawihte khap leh zawrh phal chungchangah hian Mizoram mipui ngaihdan a inang ngai dawn lo. Dan hnuaia zu zawrh theih ṭha ti mi tam tak an awm a, zu khap duh mi tam tak an awm bawk a; a khawi zawk nge tam tih hriat theih a ni lo.

Dan hnuaia zu leh a kaihhnawih - wine, beer leh a dangte zawrh hian ṭhatna leh ṭhat lohna a nei a, khap pawhin ṭhatna leh ṭhat lohna a nei bawk. Khap a ni emaw, dan hnuaia zawrh phal a ni emaw, faktu leh sawiseltu mi tam tak an awm reng dawn. Politics game leh inbeihna hmanraw langsar tak a la ni zui zel bawk ang.

Zu, beer leh wine khap leh khap lohin ṭhatna leh ṭhat lohna hrang hrang a neih karah hian sorkar tan thutlukna siam ngei a ngai si a; ram leh mipui tana ṭha ber turin sorkar hian huaisen takin thutlukna siam mawlh teh se.

Zu leh a kaihhnawihte khap leh khap loh chungchanga sorkar thutlukna chu eng lam hawi pawh ni se, ram mipui hian kan hriatthiampui a ṭha. Kan duh dan ang záwngin thutlukna an siam lo a nih pawhin, mi tam tak ngaihdanin thutlukna an siam ve tho a ni tih kan hriat a, kan pawm thiam a ngai a ni.