Ṭhalaite an taimâk lehzual a ṭul

Chief Minister chuan Chapchar Kût hmannaa thu a sawiah, Mizo zawng zawngte zelthel lo tur leh taima tur te, mahni hna ṭheuh chu Pathianin a hùnna leh a rawngbàwlna a nih tih hre turin a fuih a, "Kan zavai hian kan eizawnna ṭheuhah tih tak zet kan chhuah chuan he hnam hi a ropui ang," a ti.

Chief Minister thusawi hi a pawimawh tak zet a, Mizo mipui hian zâwm thei ila hmasawnpui tham a ni. Mi taima tak tak, hna thawk rim tak tak mi tam tak awm mah se, hnathawh chungchangah hian inenfiahna tur kan nei ngeiin a lang.

Aizawla sumdawnna hmunpui Zarkawt leh Dawrpui velah hian zing dar 7 hma lam aṭangin hnam dangte hna thawkin an phe suau suau tawh a, Mizo ṭhalai hna thawk hmuh tur an tam lo hle. Hemi chungchangah hian Mizo ṭhalaite thlavâng hauhna tur sawi theih a awm mai thei a; chutih rualin, inenfiahna tur a awm ngei bawk ang.

Mizo ṭhalai zingah taima tak tak leh thawh hreh nei loa thawh tur remchang awm apiang thawk bawrh bawrh ṭhin ṭhahnem tak an awm; ṭhalai hrisel tak ni si, hna thawh tum lo tam tak an awm bawk.

Hnaah hian ṭhalaite hi kan duhtui lutuk a ni em? Duhtui thei kan ni rêng em? Inenfiah a ṭha. Kan phâk chin, kan theih chin hre chiang lo hian thawh duh bik neiin, hna hnuaihnung tih kan ngah lutukte pawh a ni palh thei.

Zirna lamah kan sang fú a ni thei a, zirnaa kan thlen chin hre kar chungin kan thiamnain a phû tâwk hna kan nghak a ni thei. Mahse, keimahni ang bawka thiamna nei mi dang tam tak an awm ve tho avangin, kan phû tâwk nia kan hriat hna chu kan indaih kher lo ang, kan chang kher lo thei bawk.

Chuvang chuan, mahni kutkawih eizawnna lam hi ṭhalai lehkhathiamte hian tun aia an bawh lehzual a ṭul; chutiang tur chuan taimak a ngai a, kawng zawn peih a ngai a, beidawng loa tih hrâm hrâm a ṭul.

Hna thawk loin hmasawn theih a ni lo a, kan chhungte thawh chhuah sa hi kan ring reng thei dawn lo. Mizote, a bikin ṭhalaite'n taimâk hi mimal leh chhungkuaa kan hlawhtlinna tur a ni tih hre chianga kan taimâk lehzual a ngai tak zet a; ram/state anga hma kan sawn phahna tur pawh a ni e.