ADA hnathawh chhunzawm ni se

Council of Ministers chuan Aizawl Development Authority (ADA) ṭhiah rawtna an pawm. ADA hi kum 2006 khan din a ni a; ṭhiah a nih tâk avangin an mawhphurhna leh hnathawh ṭhin chu Aizawl Municipal Council (AMC) kutah dah a ni.

ADA hian hna ṭha tak a thawk a, hun rei tak chhung kaihruaitu nei mumal loa awm Aizawl khawpuiin a ṭhatpui hle. Mahni duhna apiangah kan duh dan ṭheuhin in kan sa a, a sa huai deuhte chu ṭhenawmte tana mangkhawng an ni zui mai bawk. A zakthei lo deuhin vantlang kawng an nêk a, keimahni leh keimahni kan inhnawh chêp a; khawpui ṭhang ve tak ni si, awmze nei loa ṭhang a ni ber mai.

AMC hian ADA hna hi ṭha tak leh huaisen taka a chhunzawm ngam a ngai a, Aizawl khawpui ṭhan zel dan tur thlir chunga thutlukna a siam a ṭha hle. Tun hnaiah in sak danah pawh sawisel tur tam tak a awm leh ṭan ta a, ADA din ṭan tirh lama an khauh ang kha chuan an khauh ta lo deuh a ni mai thei a, ṭan mar tlat a ṭul hle a ni.

Aizawl khawpuia mihring leh lirthei pun chak dan te, kan in sak dante leh kan khawsak dan en hian enkawltu mumal tak, a ṭul huna huaisen taka mipui pawh nêk ngam neih a hun ta. ADA-in bul an ṭan tirha huaisen leh ṭhahnemngai taka an thawh kha AMC hian chhunzawm ngei rawh se.