STEE Category I

State Medical & Technical Entrance Examination 2015-a Category I-a dah tak Chakma zirlai 13-te chu MZP chuan seat pek ṭha an ti lo a, hei hi Higher and Technical Education department hotute pawh an hriattir tawh. Central YMA pawhin STEE Category I-a Chakma telh an ni chu ṭha an tih loh thu an lo sawi tawh.

STEE buaina hi a la fel mai dawn lo a ang hle a, court pawh thleng tawh, court-in thu a tihtawp leh tawh, a buaina erawh la tawp si lo a ni ber. Tuna STEE Category I-a Chakma an lo luh leh theih chhan hi chu court-ah sorkarin thiam a chan dawn loh vang tih a chiang a, a bulpui ber chu STEE an siam ṭan tirha an fimkhur tawk loh vang niin a lang a, chumi nghawng chu a kal zel dawn a nih hmel hle.

Chakma-te hi ram leilung fa dik tak an ni lo a, Chakma zinga ṭhenkhatte erawh hi chu dan anga ram leilung faa chhiar theihte an ni. Mizorama awm Chakma tam takte erawh hi chu dan loa Mizorama lo lut an ni a, heng mite leh an thlahte'n Mizoram quota luaha zirna sang zawk an zir a nih chuan a fel lo hle a ni.

Thil pawi tak erawh chu dan angin court-ah he thil hi chai ni dawn ta se, sorkar lamin thiam thu sawi tur an nei dawn lo niin a lang tawh. Tunah pawh nawrna avangin sorkar chuan STEE Category I aṭangin Chakma hi a paih ngawt a, court lamah an zualko a, court chuan a hmaa STEE Category I-a lo awm tawh Chakmate paih ngawt hi a rem ti lo a ni ber. Sorkarin Chakmate hi STEE Category I-ah dah lêt lo ta se, kumina technical zirlaite seat hi Mizoramin kan chân phah thei niin an sawi bawk si a, chuvangin court-a thubuai awm hi chinfel thuai a nih theihna turin STEE Category I-a Chakma dah hi a ṭul leh ta niin a lang.

STEE Category I-a Chakma awm hi thil thar a ni hauh lo a, tun hma pawhin an awm reng tawh a, hriat leh ngaimawh an hlawh lo mai zawk a ni. MZP-in an duh loh thu an au chhuahpui hnuah sorkarin STEE Category I aṭangin Chakma-te a han paih a; nimahsela court-ah sorkar a chak leh dawn si loh avangin a kal dan ngaia kal turin a inhnukdawk leh a ni ta ber.

He dinhmun khirhkhan leh tlawmthlak taka kan luh chhan hi a tira a dan duangtute fimkhur loh vang a ni thei a, a nih loh vek pawhin a duangtu zingah Chak-mate duhsak taka tum nei rana thil ti duh an awm pawh a ni thei. Tun anga STEE Category I-a Chakma an tel zel dawn a nih chuan Chakma zirlaite hi an thlahtu bul lam thlenga chhui ni se, dan anga ram leilung faa chhiar theih ni lo an awm a nih chuan Mizoram quota an luah hi chu a rem lo hle a ni.