Hriselna atan kea kal tam
Tun hnai chhoah Mizoram Health Systems Strengthening Project (MHSSP) hnuaiah khaw hrang hrangah mipuiin hriselna ṭha zawk an neih theih nan 'Walk for Health' tih thupui hmangin kea kal rûnpui, Walkathon' buatsaih a ni ṭhin. Mizorama district pangaah district level-a kalpui tur a nih bakah, village level-ah khaw 510-ah buatsaih tum a ni.
Hetih lai hian Chief Minister chuan kumin Chapchàr Kût hmannaah Mizo ṭhalaite chu taima tura a chah pahin, mahni veng chhunga biak-ina inkhawmnaah lirthei keng zel loa kea kal ṭhin turin a chah.
MHSSP hmalaknaa kea kal tam tura inzirtirna kalpui a ni hi a lawmawm hle mai a, rah ṭha tak chhuah ngei se a duhawm. CM-in mahni veng chhunga inkhawm tura lirthei, a bik takin two wheeler keng zel lo a, kea kal ṭhin tura ṭhalaite a chah pawh hi thil ṭha leh tih àwm tak a ni a, zawm atana a ṭha hle.
Mizoram hi state rethei tak la ni reng mah se, mipui khawsak erawh a ziaawm ve tial tial a, lirthei nei an tam ta hle. Khawpuiah phei chuan chhungkaw tinin lirthei eng emaw ber an nei vek tawh emaw tih mai tur a ni a, thingtlang lamah pawh lirthei a tam tawh viau.
Mahni khua/veng chhunga tawi tê kal tur leh inkhawm tur pawhin lirthei kan hmang nasa tawh a, thingtlangah pawh fehnaa lirtheia kal an tam sâwt hle. Lirthei hman ṭangkai hi a ṭha a, awlsamna min thlen nasa. Hriselnain a tawrh phah thei a ni tih erawh kan ngaihtuah thlen a ṭha. Chutih karah chuan ei leh in tur kan nei ṭha tial tial bawk.
Mithiamte chuan taksa hriselna atan ni khatah minute 30-40 vel tal kal pangngai taka kea kal a ṭha an ti a; zawm harsa lem lo a ni. Ni tin minute 30-40 kein kan kal zat zat thei lo a nih pawhin, mahni veng chhunga chêt vêlnaah hi chuan lirthei leklam lutuk loh a ṭha.
Mizo mipui zinga tam takte nun dan phung hi hriselna atana ṭha lo, hriselna tiderthâwng thei a tam ta hle, kan fimkhur a ngai. Kea kal tam hi taksa atan, hriselna atana ṭha em em, sum leh pai ngai lo, awlsam si a ni. Hriselna hi keimahni ṭheuh kutah thui tak a innghat a, chumi tur chuan kea kal tam i uar zel ang u.